ދުނިޔޭގައި އޮތީ އެންމެ ދިވެހިރާއްޖެއެއް ކަމަށާއި، ރާއްޖޭގައި އީގަލް ހިލްސްއިން ކުރާ އިންވެސްޓްމަންޓްތަކުގައި އެންމެ ބޮޑު އިސްކަމެއް ދޭނީ ރާއްޖޭގެ އިޤްތިޞާދަށް ކުރާނެ ފައިދާއާއި ދެމެހެއްޓެނިވި ތަރައްޤީއަށް ކަމަށް އެ ކުންފުނީގެ ޗެއާމަން މުޙައްމަދު އަލާއްބާރު ވިދާޅުވެއްޖެއެވެ.
މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން ޢާންމުކުރި މަޢުލޫމާތުގައިވާ ގޮތުން، އަލާއްބާރު ވަނީ ރާއްޖޭގައި އިންވެސްޓްކުރުމާ ގުޅޭގޮތުން އެ ކުންފުނިން ގެންގުޅޭ ޚާއްޞަ ތަޞައްވުރު ހިއްސާކުރައްވާފައެވެ. އެގޮތުން މުޅި ދުނިޔޭގައިވެސް ދިވެހިރާއްޖެ ފަދަ އެހެން ދެވަނަ ޤައުމެއް ނެތްކަން އޭނާ ފާހަގަކުރެއްވިއެވެ.
އަލާއްބާރު ވިދާޅުވި ގޮތުގައި، ރާއްޖޭގައި ކުރިއަށްގެންދާ އިންވެސްޓްމަންޓް މަޝްރޫޢުތަކުގެ މައިގަނޑު މަޤްޞަދަކީ ދިވެހިރާއްޖޭގެ އަމިއްލަ އިޤްތިޞާދަށް އެދެވޭ ބޮޑު އަސަރެއް ކުރުވުމެވެ. އަދި އޭގެ އިތުރުން ތިމާވެށްޓާއި ރައްކާތެރިކަމަށް ބަލައިގެން ދެމެހެއްޓެނިވި ގޮތެއްގައި ކަންކަން ރޭވުމަށް ޚާއްޞަ ސަމާލުކަމެއް ދެވޭނެއެވެ.
ޔުނައިޓެޑް އަރަބް އެމިރޭޓްސްގެ ދުބާއީގައި ބޭއްވި ޚާއްޞަ ރަސްމިއްޔާތެއްގައި އީގަލް ހިލްސް ކުންފުންޏާއި ދިވެހި ސަރުކާރާ ދެމެދު ވަނީ ރަސްމާލެ ސަރަޙައްދުގައި ބޮޑު މަޝްރޫޢެއް ހިންގުމުގެ އެއްބަސްވުމުގައި ސޮއިކޮށްފައެވެ. މި މަޝްރޫޢަކީ ފުށިދިއްގަރު ފަޅުގައި “މާލްދީވްސް ވޯޓަރފްރަންޓް އެންޑް މެރީނާ” ގެ ނަމުގައި ތަރައްޤީކުރާ އިންޓެގްރޭޓެޑް މަޝްރޫޢެކެވެ.
މީގެއިތުރުން، އެ ކުންފުނިން ރާއްޖޭގައި ހިންގާ ކޮންމެ މަޝްރޫޢެއްވެސް ފުރިހަމަކުރާނީ ނުހަނު އިޚްލާޞްތެރިކަމާއެކު، ހިތުގެ އަޑިން ކަމަށް އަލާއްބާރު ފާހަގަކުރެއްވިއެވެ. މި މަޝްރޫޢުތަކުގެ ސަބަބުން ރާއްޖޭގެ ޢުމްރާނީ އަދި އިޤްތިޞާދީ ދާއިރާއަށް އެދެވޭ ބޮޑެތި ކުރިއެރުންތަކެއް ލިބިގެންދާނެ ކަމަށް ބެލެވެއެވެ.
ކިޔުންތެރިންގެ ހިޔާލު