މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން އަމިއްލަ އިސްނެގުމުގައި ހާމަކުރަން ލާޒިމުކުރާ ހުރިހާ މައުލޫމާތެއް އެމްޑަބްލިޔުއެސްސީން ރަސްމީ ވެބްސައިޓުގައި ފުރިހަމައަށް ޝާއިއުކޮށްފިއެވެ.
މިއާއެކު، އެމްޑަބްލިއުއެސްސީ ވެގެންގޮސްފައިވަނީ އަމިއްލަ އިސްނެގުމުގައި ހާމަކުރަންޖެހޭ މަޢުލޫމާތު ފުރިހަމައަށް ޝާއިއުކުރި ދައުލަތުގެ ފަސްވަނަ ކުންފުންޏަށެވެ. އަދި މުޅި ރާއްޖޭގެ ދައުލަތުގެ ހުރިހާ އިދާރާތަކުގެ ތެރެއިން މިއީ މިފަދައިން މައުލޫމާތު ފުރިހަމައަށް ހާމަކުރި ސާޅީސް ދެވަނަ އިދާރާއެވެ.
އިންފޮމޭޝަން ކޮމިޝަނަރުގެ އޮފީހުން ކަނޑައަޅާފައިވާ މިންގަނޑުތަކާ އެއްގޮތަށް، ކުންފުނީގެ ހިންގުމާ ބެހޭ އުސޫލުތަކާއި، ބަޖެޓުގެ މައުލޫމާތުގެ އިތުރުން އިސް ވެރިންގެ މަސްއޫލިއްޔަތުތަކާއި ނިންމުންތައް ނިންމާ ގޮތުގެ ތަފްސީލު މިހާރު އެ ކުންފުނީގެ ވެބްސައިޓުން އާންމުންނަށް ބައްލަވާލެއްވޭނެއެވެ. މީގެ އިތުރުން، އާންމުކޮށް ދެވޭ ހިދުމަތްތަކާއި، ޝަކުވާ ހުށަހަޅާނެ މެކޭނިޒަމްގެ ތަފްސީލުތައްވެސް ވަނީ ހިމަނާފައެވެ.
މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ތިރީސް ހަތްވަނަ މާއްދާގައިވާ ގޮތުން، ދައުލަތުގެ އިދާރާތަކުން އާންމުންގެ އެދުމަކާ ނުލައި، އަމިއްލަ އިސްނެގުމުގައި އަހަރަކު އެއްފަހަރު ވަކި މައުލޫމާތުތަކެއް އާންމުކޮށް ފެންނާނެހެން ހާމަކުރަންޖެހެއެވެ. ދައުލަތުގެ ކުންފުނިތަކާއި އިދާރާތަކުން ދެފުށް ފެންނަ ގޮތަށް މަސައްކަތްކުރުން އިތުރުކުރުމަށްޓަކައި އިންފޮމޭޝަން ކޮމިޝަނަރުގެ އޮފީހުން އަންނަނީ ހާއްސަ މަސައްކަތްތަކެއް ކުރަމުންނެވެ.
ކިޔުންތެރިންގެ ހިޔާލު