މާތްވެގެންވާ މައްކާއަށް ހޫތީން ދޭން އުޅުނު ހަމަލާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަރުކަށި އިބާރާތުން ކުށްވެރިކުރައްވައިފި އެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ މައްކާގެ މާތްވެގެންވާ ބިމަށް އަމާޒުކޮށް ހޫތީން ދޭން އުޅުނު ޑްރޯން ހަމަލާ އެންމެ ހަރުކަށި އިބާރާތުން ކުށްވެރި ކުރައްވާ ކަމަށެވެ. މުސްލިމުންގެ މުޤައްދަސު ބިމުގެ އަމާންކަމާއި ހުރުމަތް ކެނޑޭފަދަ ކޮންމެ އަމަލަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް ރައީސް ވިދާޅުވި އެވެ. އަދި މިފަދަ ހަމަލާއަކީ މުޅި އިސްލާމީ އުންމަތަށް ލިބޭނެ ފުން ހިތާމައެއް ކަމަށް އެމަނިކުފާނުގެ ޕޯސްޓުގައި ލިޔުއްވާފައިވެ އެވެ.
ރައީސް ވިދާޅުވީ ދިވެހިރާއްޖެ އޮތީ ސައޫދީ ޢަރަބިއްޔާގެ ސަރުކާރާއި ރައްޔިތުންނާއެކު ފުރިހަމަ އެއްބައިވަންތަކަންމަތީގައި ކަމަށެވެ. އަދި މާތްވެގެންވާ އެ ބިމާއި، ޙައްޖާއި ޢުމްރާގެ އަޅުވެރިންނާއި، މައްކާގެ ރައްޔިތުން ރައްކާތެރިކުރުމުގައި ސައޫދީ އެއާ ޑިފެންސް ފޯސަސް އިން ދެއްކެވި އަވަސް އަދި ހަރުދަނާ ފިޔަވަޅުތަކަށް ތައުރީފު ކުރައްވާފަައިވެ އެވެ.
މިފަދަ ހަމަލާތައް ވަގުތުން ވަގުތަށް ހުއްޓާލުމަށް ގޮވާލައްވައި، އެމަނިކުފާނުވަނީ މަސްލަހަތު އިތުރަށް ގޯސްވިޔަނުދީ، ސުލްޙައާއި ވާހަކަދެއްކުމުގެ މަގު ޚިޔާރުކުރުމަށް އެންމެހައި ފަރާތްތަކަށް އިލްތިމާސް ކުރައްވާފަ އެވެ.
މައްކާއާ ދިމާލަށް ހޫތީން ފޮނުވާލި ޑްރޯނެއް ވައިގެ ތެރޭގައި ހުއްޓުވައި ވައްޓާލާފައިވާ ކަމަށް ސައޫދީ އަރަބިއްޔާއިން ވަނީ ހާމަކޮށްފަ އެވެ. ސައޫދީ އިސްވެ އޮންނަ ކޯލިޝަންގެ ތަރުޖަމާނު ތުރްކީ އަލް މާލިކީ ވިދާޅުވީ، އަންގާރަ ދުވަހުގެ ހަވީރު ސައޫދީ ރޯޔަލް އެއާ ޑިފެންސް ފޯސަސްއިން އެ ޑްރޯން ހުއްޓުވީ މަނާ ވައިގެ ސަރަހައްދަށް ވަނުމުގެ ކުރިން ކަމަށެވެ.
އަލް މާލިކީ ވަނީ މިއީ އަޅުކަންކުރާ މީހުން ބިރުގަންނަވައި އާންމުންނަށް ގެއްލުން ދިނުމަށް ކުރި މަސައްކަތެއް ކަމަށް ވިދާޅުވެ އެކަން ކުށްވެރިކުރައްވާފައެވެ. އަދި ހުރުމަތްތެރިވެގެންވާ ދެ ހަރަމްފުޅާއި ޒިޔާރަތްކުރާ މީހުންގެ ރައްކާތެރިކަމަކީ “ރަތް ރޮނގެއް” ކަމަށް ވިދާޅުވެ އިންޒާރު ދެއްވި އެވެ.
މީގެ ކުރިން ހޫތީން ވަނީ މައްކާއަށް ހަމަލާދޭ ކަމަށް ކުރެވޭ ތުހުމަތުތައް ދޮގުކޮށް، މާތްވެގެންވާ އެފަދަ ތަންތަނަށް އެމީހުން އަމާޒު ނުކުރާ ކަމަށް ބުނެފަ އެވެ.
ކިޔުންތެރިންގެ ހިޔާލު