ބޯނަސް ނުލިބޭތީ އާއި އެ ނޫން ސަބަބުތަކާހުރެ އާޖެންޓީނާގެ ކޯޗުކަމުގައި ދެމިހުރިމާމެދު ސުވާލު އުފެދިއްޖެއެވެ.
އާޖެންޓީނާގެ ކޯޗުގެ ގޮތުގައި ލަޔޮނަލް ސްކަލޯނީ ހުންނަތާ މިހާރު ވަނީ 8 އަހަރުވެފައެވެ. އޭނާގެ ކޮންޓެކްޓު މިއަހަރުގެ ނިޔަލަށް ހަމަވާނެއެވެ. އޭނާގެ ކޯޗުކަމުގައި އާޖެންޓީނާ ވަނީ 2021 އާއި 2025 ވަނަ އަހަރުގެ ކޮޕާ އެމެރިކާ އާއި 2022ގެ ވޯލްޑް ކަޕާއި ފައިނަލިސިމާ ތަށި ކާމިޔާބު ކޮށްފައެވެ. ނަމަވެސް މި ކާމިޔާބީތަކާއެކު ކުޅުންތެރިންނާއި ޓީމުގެ އޮފިޝަލުންނަށް ދޭން ޖެހޭ ބޯނަސް ދީފައި ނުވުމަކީ ސްކަލޯނީ ކޮންޓްރެކްޓް އައު ކުރަން އެއްބަސް ނުވާ އެއް ސަބަބެވެ. ކުރިއަށް އޮތް ފީފާ އިންޓަނޭޝަނަލް ބްރޭކްގައި ކުޅޭ އެކުވެރިކަމުގެ މެޗުތަކަށް 20 ދުވަހަށް ވެފައިވާއިރު އަދިވެސް އާޖެންޓީނާގެ ޓީމު ފައިނަލެއް ނުކުރެއެވެ. މީގެ ސަބަބަކީ ސްކަލޯނީ މަސައްކަތާ ދުރުގައި މިވަގުތު ހުރުމެވެ.
ރިޕޯޓްތައް ބުނާ ގޮތުން ކޯޗު ކޮންޓްރެކްޓް އާ ކުރުމާމެދު ގޮތެއް ނުނިންމައި ހުރި އަނެއް ސަބަބަކީ ކެޕްޓަން ލަޔޮނަލް މެސީ ރިޓަޔާ ކުރުމެވެ. މީގެ އިތުރުން މިދިޔަ އަހަރުތަކުގައި ޓީމުގައި ތިބި ސީނިއަރ ގިނަ ކުޅުންތެރިން ރިޓަޔާ ކުރުމާއެކު އަލުން ޓީމު ބިނާ ކުރަން ޖެހުމަކީ ވެސް ސަކަލޯނީ އަށް އޮތް ކަންބޮޑުވުމެކެވެ.
ތިން ވަނަ ސަބަބަކީ މިދިޔަ އަށް އަހަރު އޭނާ ކުރި މަސައްކަތް އެ ބާރު މިނުގައި ކުރެވިދާނެ ކަމާމެދު އަމިއްލަ ނަފްސަށް ފުރިހަމަ އިތުބާރު ނެތުން ކަމަށްވެސް އާޖެންޓީނާގެ މީޑިޔާތަކުން ބުނެއެވެ. މީގެ އެއް ސަބަބަކީ ކޯޗިން ސްޓާފުގެ ބައެއް މެމްބަރުން އަމިއްލަ ކޯޗިން ކެރިއަރެއް ފަށަން ތައްޔާރުވެ ގައުމީ ޓީމާ ވަކިވާން ތައްޔާރުވަމުންދާތީއެވެ. މީގެ ތެރޭގައި އެސިސްޓެންޓް ކޯޗު ވޯލްޓާ ސެމިއުލްވެސް ހިމެނެއެވެ.
ކިޔުންތެރިންގެ ހިޔާލު