ފ. ފީއަލީގައި ތަރައްގީކުރާ ޒަމާނީ ފުޓްސަލް ދަނޑުގެ މަސައްކަތް ބާރު ސްޕީޑްގައި އެމްޓީސީސީން ކުރަމުން އެބަދެއެވެ.
މިހާރު ކުރިއަށްދަނީ ފީއަލީގައި ތަރައްގީކުރާ ޒަމާނީ ފުޓްސަލް ދަނޑުގެ ވެލިއެޅުމާއި ބިން އެއްވަރުކުރުމުގެ މަސައްކަތެވެ.
މި މަޝްރޫއަކީ ޒުވާނުންނަށް ކުޅިވަރު ކުޅެވޭނެ މަގުތައް ފަހިކޮށްދިނުމަށާއި، ކުޅިވަރުގެ ތެރެއިން ރައްޔިތުންނަށް ދުޅަހެޔޮ އުފާވެރި ދިރިއުޅުމަކަށް މަގުފަހިކޮށްދިނުމަށް ސަރުކާރުން ކުރިއަށްގެންދާ ހާއްސަ ސިޔާސަތުގެ ދަށުން ހިންގާ މަޝްރޫއެކެވެ.
މި މަސައްކަތުގެ ތެރެއިން ފީއަލީ ފުޓްސަލް ދަނޑުގެ ބިން އެއްވަރުކޮށް ނިމުމުން، ދަނޑުގައި ޓާފް އެޅުމުގެ މަސައްކަތް ފެށުމަށް ވަނީ ހަމަޖެހިފައެވެ. މީގެ އިތުރުން ދަނޑުގެ ވަށައިގެން ފެންސް ޖެހުމާއި، ރޭގަނޑު ކުޅެވޭނެހެން ބައްތި ހަރުކޮށް އަލިކުރުމުގެ މަސައްކަތް ވެސް މި މަޝްރޫއުގެ ތެރޭގައި ހިމެނެއެވެ.
ރާއްޖޭގެ މީހުން ދިރިއުޅޭ ރަށްރަށުގައި ޒަމާނީ ފެންވަރުގެ ފުޓުބޯޅަ ދަނޑުތަކާއި، ފުޓްސަލް ދަނޑުތައް، އަދި އެހެނިހެން ކުޅިވަރު ކޯޓުތައް ތަރައްގީކުރުމަށް މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން ދަނީ ގިނަ މަޝްރޫއުތަކެއް ހިންގަމުންނެވެ. މިފަދަ ވަސީލަތްތައް ގާއިމުކުރުމުގެ މައިގަނޑު ބޭނުމަކީ ރަށްރަށުގެ ޒުވާނުންނަށް ކުޅިވަރުގެ ފުރުސަތުތައް ފުޅާކޮށްދީ، އިޖުތިމާއީ ބަދަހިކަން އިތުރުކުރުމެވެ.
ކިޔުންތެރިންގެ ހިޔާލު