ޤައުމީ އިންޖީނިއަރުންގެ ދުވަސް ފާހަގަކުރުމުގެ ގޮތުން އެސްޓީއޯ ކޮންސްޓްރަކްޝަން ސޮލިއުޝަންސްއިން އިންޖީނިއަރިންގ ދާއިރާއިން މަތީ ތަޢުލީމު ޙާޞިލުކުރަމުންދާ ދަރިވަރުންނަށް އަމާޒުކޮށްގެން ޚާއްޞަ ހަރަކާތްތަކެއް ކުރިއަށްގެންގޮސްފިއެވެ.
ކޮންމެ އަހަރެއްގެވެސް އޮގަސްޓު 30 ވަނަ ދުވަހު ފާހަގަކުރާ އިންޖީނިއަރުންގެ ދުވަހާ ގުޅުވައިގެން އެސްޓީއޯގެ ޓްރެއިނިންގ އިންސްޓިޓިއުޓްގައި ބޭއްވި މި އިވެންޓުގައި ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އިންޖިނިއަރިންގގެ ދަރިވަރުން ވަނީ ބައިވެރިވެފައެވެ. މި ހަރަކާތް ޝަރަފުވެރިކޮށްދެއްވީ އެމްއެންޔޫގެ ޗާންސެލަރ ޑރ. މަޙްމޫދު ޝައުޤީއެވެ. އަދި އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހިމްގެ އިތުރުން އެސްޓީއޯއާއި އެމްއެންޔޫގެ އިސްވެރިންވެސް ބައިވެރިވެވަޑައިގެންނެވިއެވެ.
މި އިވެންޓުގެ ތެރެއިން އެސްޓީއޯއިން ރާއްޖޭގެ ކޮންސްޓްރަކްޝަން ދާއިރާގައި ކުރަމުންދާ މަސައްކަތްތަކާ މެދު ދަރިވަރުންނަށް މަޢުލޫމާތު ދިނުމަށްފަހު، ޢަމަލީ ތަޖުރިބާ ހޯދައިދިނުމުގެ ގޮތުން ސައިޓް ވިޒިޓްތަކެއް ވަނީ ކުރިއަށްގެންގޮސްފައެވެ.
އެގޮތުން އެސްޓީއޯގެ ރެޑީމިކްސް ކޮންކްރީޓް އުފައްދާ ސައިޓަށާއި، ކޮންކްރީޓް ލެބާއި، މަކިޓާ ޝޯރޫމްގެ އިތުރުން ނިޕޯން ޕެއިންޓްގެ ކަލަރ މިކްސިންގ ޓެކްނޮލޮޖީ މަސައްކަތްކުރާ ސަރަޙައްދަށް ދަރިވަރުން ޒިޔާރަތްކުރިއެވެ. މީގެއިތުރުން އިންޖީނިއަރިންގގެ ފަންނީ ބޮޑު މަސައްކަތެއް ކަމަށްވާ އެލެވޭޓަރ ނުވަތަ ލިފްޓް އިންސްޓޯލްކުރާ ސައިޓަކަށް ގޮސް، އަމަލީގޮތުން އެ މަސައްކަތް ކުރާ ގޮތްވެސް ދަރިވަރުންނަށް ވަނީ ދައްކާލާފައެވެ.
ކިޔުންތެރިންގެ ހިޔާލު