ސިންގަޕޫރުގެ ވަންޑާ ނޭޝަނަލް ޖޫނިއާ ސައިންސް އޮލިމްޕިއާޑުގައި ބައިވެރިވެ ރާއްޖޭގެ ބްރައިޓްވޭ އިންޓަނޭޝަނަލް ސްކޫލުގެ 43 ދަރިވަރަކު ފަޚުރުވެރި ކާމިޔާބީއަކާއެކު މެޑަލް ހާސިލުކޮށްފިއެވެ.
އުޒުބެކިސްތާނުގައި ބޭއްވުމަށް ހަމަޖެހިފައިވާ ފައިނަލް ރައުންޑަށް ދާނެ ކުދިން ހޮވުމަށްޓަކައި ރާއްޖޭގައި ކުރިއަށް ގެންދިޔަ ބުރުގައި ބްރައިޓްވޭގެ ދަރިވަރުން ވަނީ ޖުމްލަ 43 މެޑަލް ހޯދާފައެވެ. އޭގެ ތެރޭގައި ހިމެނެނީ ނުވަ ރަން މެޑަލް، 15 ރިހި މެޑަލް އަދި 19 ލޯ މެޑަލްއެވެ. މި މުބާރާތުން މެޑަލް ހާސިލްކުރި ހުރިހާ ދަރިވަރުން ވެސް މިހާރު ވަނީ އަންނަ ޑިސެމްބަރު މަހުގެ 11 އިން 17 އަށް އުޒުބެކިސްތާނުގައި ބާއްވާ މި މުބާރާތުގެ ގްލޯބަލް ރައުންޑް – “ސްޓީމް އަހެޑް 2026” އަށް ކޮލިފައިވެފައެވެ.
މި މުބާރާތަކީ ސިންގަޕޫރުގެ ސްކޫލް ސައިންސް ސިލަބަހުގެ މައްޗަށް ބިނާކޮށް، ގްރޭޑް 3 އިން 10 އާ ދެމެދުގެ ދަރިވަރުންނަށް ހާއްސަކޮށްގެން ކުރިއަށްގެންދިޔަ މުބާރާތެކެވެ. މި މުބާރާތް ބޭއްވުމުގެ މައިގަނޑު މަޤްޞަދަކީ ދަރިވަރުންގެ ފުންކޮށް ވިސްނުމުގެ ހުނަރު އިތުރުކުރުމާއި، ސައިންޓިފިކް ކޮންސެޕްޓްތަކުގެ އަލީގައި އުފެއްދުންތެރި ވިސްނުން ތަރައްޤީކޮށް، ދިމާވާ އެކި ގޮންޖެހުންތަކާ ކެރިގެން ކުރިމަތިލުމަށް ހިތްވަރު ދިނުންކަމަށް ބަރައިޓް ވޭއިން މައުލޫމާތު ދީފައިވެއެވެ.
ދުނިޔޭގެ ފެންވަރުގައި ބޭއްވޭ މި މުހިންމު ހަރަކާތުގެ ސަބަބުން ދުނިޔޭގެ އެކި ކަންކޮޅުތަކުން ޒުވާން ސައިންސްވެރިން އެއްތަނަކަށް އެއްވެ، މައްސަލަތައް ހައްލުކުރުމުގެ ޤާބިލުކަން އިތުރުކޮށް، އުފެއްދުންތެރިކަމުގެ ދާއިރާއިން އެއްބާރުލުން ދިނުމަށް ފުރުސަތު ފަހިވެގެންދާނެއެވެ.
ބައިނަލްއަޤްވާމީ ފެންވަރުގައި ބްރައިޓްވޭގެ ދަރިވަރުން ހޯދި މި ފާހަގަކޮށްލެވޭ ކާމިޔާބީއަށް މަރުހަބާ ކިޔައި، އެ ސްކޫލުގެ މެނޭޖްމަންޓުން ވަނީ ބައިވެރިވި ހުރިހާ ދަރިވަރުންނަށް ވަރަށް ބޮޑަށް ތައުރީފުކޮށް ހިތްވަރު ދީފައެވެ.
ކިޔުންތެރިންގެ ހިޔާލު