ބާޒާރުގައި ބިސް ނުލިބޭ ކަމަށް ބުނެ ކަންމަތީ ފިހާރަތަކުން ބިސް ވިއްކުން ކޮންޓްރޯލް ކުރަމުންދިޔަ ނަމަވެސް، އެއްވެސް ދަތިކަމެއް ނެތި ހުރިހާ ރައްޔިތުންނަށް ބޭނުންވާ ވަރަށް ބިސް ފޯރުކޮށްދެމުންދާ ކަމަށް އެސްޓީއޯއިން ބުނެފިއެވެ.
އެސްޓީއޯއިން މިކަން ހާމަކުރީ ބާޒާރުގައި ބިސް ލިބުން ދަތިވާ ކަމަށް ދެކެވޭ ވާހަކަތަކާ ގުޅިގެންނެވެ. އެ ކުންފުނިން ބުނި ގޮތުގައި ރައްޔިތުންނަށް ބޭނުންވާ އަސާސީ ކާބޯތަކެތީގެ ރޭންޖުން ބިސް ހުސްނުވެ ލިބޭނެ އިންތިޒާމު ވަނީ ހަމަޖައްސާފައެވެ.
މާލޭގެ ގިނަ ކަންމަތީ ފިހާރަތަކުން މިހާރު ވަނީ އާންމުންނަށް ބިސް ވިއްކާ މިންވަރު ކޮންޓްރޯލްކޮށްފައެވެ. އެ ފިހާރަތަކުން ބުނަމުންދަނީ ހޯލްސޭލް މާރުކޭޓުން ބިސް ލިބުމުގައި ދަތިތަކެއް ހުރުމުގެ ސަބަބުން ކޮންމެ މީހަކަށް ވިއްކެނީ ވަކި މިންވަރަކަށް ކަމަށެވެ.
ނަމަވެސް އެސްޓީއޯގެ ޕީޕަލްސް ޗޮއިސް އައުޓްލެޓްތަކުންނާއި ހޯލްސޭލް ސެންޓަރުތަކުން އެއްވެސް ހުރަހެއް ނެތި ބިސް ލިބެން ހުރި ކަމަށް އެ ކުންފުނިން ކަށަވަރުކޮށްދެއެވެ. އަދި ބާޒާރުގައި ތަކެތީގެ އަގު އުފުލުނަނުދީ ހިފެހެއްޓުމަށްޓަކައި އެކަށީގެންވާ ސްޓޮކެއް އެތެރެކޮށް ވިއްކަމުންދާ ކަމަށްވެސް އެސްޓީއޯއިން ބުނެއެވެ.
އާންމުކޮށް ބާޒާރުގައި ތަކެތީގެ ދަތިކަން އުފެދޭ ހާލަތްތަކުގައި އެސްޓީއޯއިން ދަނީ އަސާސީ ކާބޯތަކެތީގެ ބާވަތްތައް އެތެރެކޮށް ހެޔޮ އަގުގައި ރައްޔިތުންނަށް ފޯރުކޮށްދެމުންނެވެ. މިގޮތުން ކުރިއަށް އޮތް ތަނުގައިވެސް އެއްވެސް ދަތިކަމެއް ނެތި ބިސް ލިބޭނެ ކަމުގެ ޔަގީންކަން އެ ކުންފުނިން ދެއެވެ.
ކިޔުންތެރިންގެ ހިޔާލު