ހުކުރު ޚުތުބާ ކިޔުމާއި އިމާމުވެ ނަމާދުކުރުމަށް ހިންގި ޒުވާން ޚަތީބު ޕްރޮގްރާމް ފުރިހަމަކުރި 91 ޒުވާނަކަށް އިސްލާމިކް މިނިސްޓްރީން ސަނަދު ދީފިއެވެ. މި ޕްރޮގްރާމަކީ ރާއްޖޭގައި ގާބިލު ޒުވާން ޚަތީބުންނާއި އިމާމުންގެ އަދަދު އިތުރުކުރުމުގެ މަގުސަދުގައި ކުރިއަށްގެންދިޔަ ޕްރޮގްރާމެކެވެ.
މިއަދު މިނިސްޓްރީގައި ބޭއްވި ހާއްސަ ރަސްމިއްޔާތެއްގައި ބައިވެރިންނަށް ސަނަދު ހަވާލުކޮށްދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ. މި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ އިމާމުކަމަކީ ވަރަށް ބޮޑު މަސްއޫލިއްޔަތެއް ކަމަށާއި، ދީނީ އިލްމާއި ހުނަރު އިތުރަށް ތަރައްގީކުރުމަށް ދެމިތިބުމަށް އެދިވަޑައިގެންނެވިއެވެ.
ހަމައެކަނި ހުކުރު ޚުތުބާ ކިޔުމަށް ސަމާލުކަން ނުދީ، ޖަމާއަތުގެ ނަމާދުތަކުގައި ވެސް އިސްނަގައިގެން ބައިވެރިވެ، މުޖުތަމައުގައި ނަމޫނާ ބަޔަކަށް ވުމަށް މިނިސްޓަރު ޒުވާން ޚަތީބުންނަށް އިލްތިމާސްކުރެއްވިއެވެ. މިއީ މިނިސްޓްރީގެ ޒުވާން ޚަތީބު ޕްރޮގްރާމްގެ ދަށުން ތަމްރީނު ފުރިހަމަކުރި ފަސްވަނަ ބެޗެވެ.
މި ޕްރޮގްރާމަކީ ރާއްޖޭގައި އިމާމުން މަދުވުމުގެ މައްސަލައަށް ހައްލެއް ހޯދުމުގެ ގޮތުން ތައާރަފުކުރި ޕްރޮގްރާމެކެވެ. މި ޕްރޮގްރާމް ހާއްސަކޮށްފައިވަނީ ގްރޭޑް 10، 11 އަދި 12 ނިންމާފައިވާ ދަރިވަރުންގެ ތެރެއިން ހުކުރު ނަމާދު އިމާމުވެ ކުރުމަށާއި ޚުތުބާ ކިޔުމަށް ޝައުގުވެރިކަން ހުންނަ ދަރިވަރުންނަށެވެ. ސަރުކާރުގެ އަމާޒަކީ މި ދައުރުގެ ތެރޭގައި 1,000 ޒުވާން ޚަތީބުން ތަމްރީނުކުރުމެވެ.
ކިޔުންތެރިންގެ ހިޔާލު