ސަރުކާރުގެ ހަރަދުތައް ހަމަޖެއްސުމަށް އިތުރު 1.2 ބިލިއަން ރުފިޔާގެ ޓީ ބިލް ގަންނާނެ ބަޔަކު ހޯދަން ފިނޭންސް މިނިސްޓްރީން އިއުލާންކޮށްފިއެވެ.
ފިނޭންސް މިނިސްޓްރީން އިއްޔެ ބުނި ގޮތުގައި މި ފަހަރު ހުޅުވާލީ، ތަފާތު ހަތަރު މުއްދަތެއްގައި އަނބުރާ ދައްކާ ގޮތަށް ހަމަޖެހިފައިވާ ޓީ-ބިލްތަކެކެވެ.
އެގޮތުން ސެޕްޓެމްބަރު 21 ވަނަ ދުވަހަށް އަނބުރާ ދެއްކުމަށް ވިއްކާ އެއް ބިލިއަން ރުފިޔާގެ ޓީ-ބިލަކާއި ނޮވެމްބަރު 30 ވަނަ ދުވަހަށް އަނބުރާ ދެއްކުމަށް ވިއްކާ 100 މިލިއަން ރުފިޔާގެ ޓީ-ބިލެއް ހިމެނެއެވެ.
އޭގެ އިތުރުން އަންނަ އަހަރުގެ ފެބްރުއަރީ 22 ވަނަ ދުވަހަށް އަނބުރާ ދެއްކުމަށް ވިއްކާ 20 މިލިއަން ރުފިޔާގެ ޓީބިލަކާއި އަންނަ އަހަރުގެ އޮގަސްޓް 23 ވަނަ ދުވަހަށް އަނބުރާ ދެއްކުމަށް ވިއްކާ 126 މިލިއަން ރުފިޔާގެ ޓީބިލެއް ހިމެނެއެވެ.
މި ޓީ-ބިލްތަކުގެ އިންޓްރެސްޓް ރޭޓްތައް އުޅެނީ 3.50 ޕަސެންޓާއި 4.60 ޕަސެންޓާ ދެމެދުގައެވެ.
މި އަހަރުގެ ބަޖެޓުގެ ހަަރަދުތައް ހަމަޖެއްސުމަށްޓަކައި ސަރުކާރުން ވަނީ މިއަހަރުގެ އެކި މުއްދަތުގައި ޓީ-ބިލް ވިއްކައިފައެވެ. އެގޮތުން މި މަހުގެ ކުރީކޮޅު ވެސް ވަނީ 1.1 ބިލިއަން ރުފިޔާގެ ޓީ-ބިލް ވިއްކަން ހުޅުވާލައިފައެވެ.
ސަރުކާރުން ވިއްކާ ޓީ-ބިލްތައް އާންމުކޮށް ގަންނަނީ ރާއްޖޭގެ ޕެންޝަން ފަންޑާއި ބައެއް ބޭންކުތަކުގެ އިތުރުން ސަރުކާރު ހިއްސާވާ ކުންފުނިތަކުންނެވެ.
ކިޔުންތެރިންގެ ހިޔާލު