ހއ. އުތީމުގައި ހުންނަ ތާރީޚީ އުތީމު ގަނޑުވަރުގެ އާބާތުރަފިލުވުމުގެ މަސައްކަތްތައް އެއްކޮށް ނިންމައި، މިއަދު އަލުން އާންމުންނަށް ހުޅުވާލައިފިއެވެ.
ސަޤާފީ ތަރިކަ ރައްކާތެރިކުރާ ގައުމީ މަރުކަޒުން މައުލޫމާތު ދިން ގޮތުގައި، މިއަދުން ފެށިގެން އުތީމު ގަނޑުވަރު ބަލައިލުމުގެ ފުރުސަތު އާންމުންނަށް ލިބިގެންދާނެއެވެ. އެގޮތުން ސަރުކާރުގެ ރަސްމީ ބަންދު ދުވަސްތައް ފިޔަވައި، ކޮންމެ ހޮނިހިރު ދުވަހަކުން ފެށިގެން ބުރާސްފަތި ދުވަހުގެ ނިޔަލަށް، ހެނދުނު 08:00 އިން މެންދުރުފަހު 14:00 އަށް ގަނޑުވަރު ހުޅުވާފައި ހުންނާނެކަމަށް އެ ވުޒާރާއިން ބުންޏެވެ. އަދި ގަނޑުވަރަށް ޒިޔާރަތްކުރަން ބޭނުންވާ ފަރާތްތަކަށް ޓިކެޓް ދޫކުރުމަށް ހަމަޖެހިފައިވަނީ ހެނދުނު 08:15 އިން މެންދުރުފަހު 13:30 އަށެވެ.
އުތީމު ގަނޑުވަރަކީ ދިވެހިރާއްޖޭގެ މިނިވަންކަމުގެ ބަތަލު، އަދި ޤައުމީ ދުވަސް އެބޭފުޅަކަށް ނިސްބަތްވާ، އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޡަމް ސިރީ ސަވާދީއްތަ މަހާރަދުންގެ ހަނދާންތަކާ ގުޅިފައިވާ އެންމެ މުހިންމު އެއް ތާރީޚީ ބިނާއެވެ.
މި ތާރީޚީ ގަނޑުވަރަކީ ގިނަ އަޖައިބުތަކަކާއިހާއްސަ ސިފަތަކެއް އެކުލެވިގެންވާ ތަނެކެވެ. އޭގެ ތެރޭގައި މަރިޔާދުގޭ ދެކުނު ފަރާތުގައިވާ ނުހުޅުވޭ ދޮރުކޮޅާއި، ފެންމީރު ލެއްގި ވަޅުކޮޅުގެ އިތުރުން، ބޭރުގެ މަންޒަރުތައް އެކޮޅުކޮޅުން ކުލަކޮށް ފެންނަ ހާއްސަ ފޮތިގަނޑު ހިމެނެއެވެ.
އުތީމު ގަނޑުވަރަކީ ދިވެހި ތާރީޚާއި ސަޤާފަތް ދައްކުވައިދޭ މުހިންމު ތަރިކައެކެވެ. މިއީ ދިވެހިންގެ އިތުރުން ރާއްޖެއަށް ޒިޔާރަތްކުރާ ބޭރުގެ ފަތުރުވެރިންގެ މެދުގައިވެސް ނުހަނު ބޮޑު މަޤްބޫލުކަމެއް ލިބިފައިވާ ތާރީޚީ މަންޒިލެކެވެ. މި ބިނާގެ އާބާތުރަފިލުވައި ރައްކާތެރިކުރުމަކީ ދިވެހި ތާރީޚު އަންނަން އޮތް ޖީލުތަކަށް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
ކިޔުންތެރިންގެ ހިޔާލު