ޤައުމީ ދުވަހުގެ މުނާސަބަތުގައި ސަރުކާރުން ދެއްވާ ޝަރަފުވެރިކަމުގެ ޤައުމީ އިނާމު ތިން ބޭފުޅަކަށާއި ޖަމުޢިއްޔާއަކަށް، އަދި ހިތްވަރު ދިނުމުގެ ޤައުމީ އިނާމު ހަތް ބޭފުޅަކަށާއި ކުންފުންޏަކަށް ދެއްވައިފިއެވެ. ހއ. އުތީމުގައި ބޭއްވި ރަސްމީ ޖަލްސާގައި މި އިނާމުތައް ދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ.
މިއަހަރު ޝަރަފުވެރިކަމުގެ ޤައުމީ އިނާމު ޙާޞިލުކުރެއްވީ ދިވެހިބަހާއި އަދަބިއްޔާތުގެ ދާއިރާއިން ގދ. ފަރެސްމާތޮޑާ ފީރޯޒްވާދީ މުޙައްމަދު ޢާމިރު އަޙްމަދާއި، އިމާރާތްކުރުމާއި ފަރުމާކުރުމުގެ ދާއިރާއިން ވ. ވަސްމީރުފިޔަ އިބްރާހީމް ރަޝީދުގެ އިތުރުން ޚަބަރާއި މައުލޫމާތު ފެތުރުމުގެ ދާއިރާއިން ގ. ނޫރީފެހި ނަޖުމާ ޙުސައިންއެވެ. އަދި ޞިއްޙީ ދާއިރާއިން މި އިނާމު ލިބުނީ ސޮސައިޓީ ފޮރ ހެލްތް އެޑިޔުކޭޝަން (ޝީ) އަށެވެ. ޝަރަފުވެރިކަމުގެ އިނާމުގެ ގޮތުގައި ރައީސުލްޖުމްހޫރިއްޔާ ދެއްވީ ޝަރަފުގެ އައްޑަނައަކާއި، ޝަރަފުގެ ބެޖާއި، ހަނދާނީ ލިޔުމެކެވެ.
ހިތްވަރު ދިނުމުގެ ޤައުމީ އިނާމު ޙާޞިލުކުރެއްވީ އިސްލާމްދީނަށް ހޭލުންތެރިކަން އިތުރުކުރުވުމުގެ ދާއިރާއިން ގއ. ދާންދޫ މުޝްތަރީގެ އަލްއުސްތާޛާ ޙައްވާ ލަޠީފާއި، ދިވެހިބަހާއި އަދަބިއްޔާތުގެ ދާއިރާއިން ހދ. ވައިކަރަދޫ ދަނބުގެ މުޙައްމަދު ނަޞީރާއި، ދިވެހި ތާރީޚުގެ ދާއިރާއިން ކޮމާންޑް ސާރޖަންޓް މޭޖަރ ޢަބްދުﷲ ސަޢީދާއި، ޞިއްޙީ ދާއިރާއިން މުޙައްމަދު އަޙްމަދުގެ އިތުރުން މުއާޞަލާތާއި އައިޓީގެ ދާއިރާއިން ހއ. އުލިގަން ފަހިވާ އަރުޝަދު އަޙްމަދެވެ. މީގެއިތުރުން ކުޅިވަރުގެ ދާއިރާއިން ޢާއިޝަތު ނައުރާއާއި، ވިޜުއަލް އާޓްސްގެ ދާއިރާއިން އިސްމާޢީލް ޢަބްދުލްޣަފޫރުގެ އިތުރުން އިމާރާތްކުރުމުގެ ދާއިރާއިން ބައިސަން މޯލްޑިވްސް ޕްރައިވެޓް ލިމިޓެޑަށްވެސް މި އިނާމު ލިބުނެވެ. ހިތްވަރު ދިނުމުގެ އިނާމުގެ ގޮތުގައި ދެއްވީ ހަނދާނީ ފިލައަކާއި ހަނދާނީ ލިޔުމެކެވެ.
މި ރަސްމިއްޔާތުގައި ދިވެހި ފުޓްބޯޅައަށް ކޮށްދެއްވި އަގުހުރި ޚިދުމަތްތަކުގެ އަގުވަޒަންކުރުމުގެ ގޮތުން، އަލްމަރްޙޫމް އިޙްސާން ޢަބްދުލްޣަނީ (ސާންތީ) ގެ ހަނދާނަށް ޚިދުމަތުގެ ޤައުމީ އިނާމު ވަނީ އަރުވާފައެވެ.
ކިޔުންތެރިންގެ ހިޔާލު