މުދާ އުފުލާ “ފްރެންޑް 4” ދޯނި ފެތުނު ހާދިސާގައި ގެއްލުނު ތިން މީހުން ހޯދުމުގެ މަސައްކަތުގެ ތެރެއިން މާދަމާގެ ނިޔަލަށް ހުވަދޫ ކަނޑުގެ ސަރަހައްދު އެއްކޮށް ބަލައި ނިމޭނެ ކަމަށާއި، ނަމަވެސް މިހާތަނަށް އެ މީހުން ފެނިފައިނުވާ ކަމަށް އެމްއެންޑީއެފުން މިރޭ ބުނެފިއެވެ.
މި ހާދިސާގައި ކަނޑަށް ގެއްލިގެން ހޯދަމުންދަނީ އެ ދޯނީގެ ކެޕްޓަން މުހައްމަދު ހަމްދޫންއާއި އެމްއެންޑީއެފްގެ ސާޖަންޓް އިބްރާހީމް އަހުމަދުގެ އިތުރުން ޕޮލިސް ސާޖަންޓް އަލީ ނާފިއުއެވެ. މި މީހުން ގެއްލުނީ ދޯންޏަށް ދިޔަވެގެން ދިޔަހިއްކުމުގެ މަސައްކަތް ކުރަމުންދަނިކޮށް ދޯނި ބަންޑުންޖަހާލައި އަޑިއަށް ދިޔަ ވަގުތުގައެވެ.
މި ދޯނި އަޑިއަށް ގޮސްފައިވަނީ ގއ. ކުޑަލަފަރީގެ އިރުއުތުރުން 8 ނޯޓިކަލް މޭލު ބޭރަށެވެ. ތ. މަޑިފުށިން ފުރައިގެން ހުވަދު އަތޮޅަށް ދަތުރުކުރި މި ދޯނި ދިޔަވާ ކަމުގެ މައުލޫމާތު ލިބުނީ އޮގަސްޓް 6 ވަނަ ދުވަހުގެ ރޭގައެވެ.
ދޯނި ފެތުނު ވަގުތު އެ ދޯނީގައި ތިބި އަށް މީހުންގެ ތެރެއިން ހަތް މީހަކު ވަނީ ސަލާމަތްކޮށްފައެވެ. ސަލާމަތްވި މީހުންގެ ތެރޭގައި ކޯސްޓްގާޑުގެ ކްރޫއަކާއި، އެމްއެންޑީއެފްގެ ފަޔަރމަނަކާއި، ފުލުހެއްގެ އިތުރުން ދޯނީގެ ތިން ފަޅުވެރިން ހިމެނެއެވެ.
އެމްއެންޑީއެފުން ބުނި ގޮތުގައި ގެއްލުނު މީހުން ހޯދުމަށް ސިފައިން ދަނީ ހުއްޓުމެއް ނެތި މަސައްކަތް ކުރަމުންނެވެ. މި ގޮތުން އިންފްރާރެޑް ސެންސަރު އެކުލެވޭ ޑްރޯން ބޭނުންކޮށްގެން ރޭގަނޑާއި ދުވާލު ވައިގެ މަގުން ސަރަހައްދު ބަލަމުންދެއެވެ.
މީގެ އިތުރުން ކޯސްޓްގާޑު ޝިޕް އިމާދުއްދީނާއި ކޯސްޓްގާޑުގެ އުޅަނދުފަހަރާއި ފުލުހުންގެ ލޯންޗުތައް ބޭނުންކޮށްގެން ކަނޑުމަގުން ދަނީ ބޮޑު ސަރަހައްދެއް ބަލަމުންނެވެ. އަދި ހުވަދޫ ކަނޑުގެ ދެކުނުން ގއ. އަތޮޅުގެ ފަރުތަކާއި، އުތުރުން ލ. އަތޮޅުގެ ފަރުތައް ވެސް ވަނީ ބަލައިފައެވެ.
މިއަދު އިރުއޮއްސި 6:00 އާ ހަމައަށް ވައިގެ މަގުން 9,920 ނޯޓިކަލް މޭލުގެ ސަރަހައްދެއް ވަނީ ބަލައިފައެވެ. އަދި ކަނޑުމަގުން 2,790.10 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް އެމްއެންޑީއެފުން މައުލޫމާތު ދެއެވެ.
ކިޔުންތެރިންގެ ހިޔާލު