މިޑްފީލްޑަރު އެންޒޯ ފެނާންޑޭޒް ގަތުމަށް ޝައުގުވެރިވާ ކުލަބުތަކަށް ޗެލްސީން ފުރުސަތު ދީފިއެވެ. އެކުލަބުން އެ ފުރުސަތު ހުޅުވާލާފައިވަނީ މާދަމާ ހަވީރު ފަހެއް ޖެހުމުގެ ކުރިންނެވެ.
ނިމުނު ވޯލްޑް ކަޕުގައި ވެސް އާޖެންޓީނާގެ ޖާޒީގައި މޮޅު ކުޅުމެއް ދެއްކި އެންޒޯ ގަތުމަށް ފައި ވިއްދާފައި ހުރީ މެންޗެސްޓާ ސިޓީންނެވެ. އެ ކުލަބުގެ މިހާރުގެ ކޯޗު އެންޒޯ މަރެސްކާއަކީ އެންޒޯއަށް ޗެލްސީގައި ކޯޗުކޮށްދިން ކޯޗެވެ. ޗެލްސީން ޔޫއޭފާ ކޮންފަރެންސް ލީގާއި ކުލަބު ވޯލްޑް ކަޕް މަރެސްކާގެ ކޯޗުކަމުގައި ކާމިޔާބު ކުރިއިރު އެންޒޯ އަކީ މުހިންމު ކުޅުންތެރިއެކެވެ. ކުރިއަށް އޮތް ސީޒަނަށް މަގާމާ ހަވާލުވީއްސުރެ އޭނާ ގަތުމަށް މަރެސްކާ މަސައްކަތް ކުރަމުންދަނީ ތަފާތު ސަބަބުތަކާހެދި އެވެ. މީގެ ތެރެއިން އެއް ކަމަކީ ޓީމުގެ ކެޕްޓަން އަދި އެންމެ މުހިންމު މިޑްފީލްޑަރު ސްޕޭނުގެ ރޮޑްރީގޯ ކުލަބުން ދާން ބޭނުންވެ އެކަން ހުށަހަޅާފައިވާތީ އެވެ.
ޗެލްސީން އެންޒޯ ވިއްކާނަމަ އަގަކަށް ނިންމާފައިވަނީ 120 މިލިއަން ޕައުންޑެވެ. މިއަގު ދޭންވެސް މުއްސަނދި ސިޓީ އޮތީ ތައްޔާރަށެވެ. ޗެލްސީން ބުނީ މާދަމާ ފަހެއް ޖެހުމާއެކު އެންޒޯ ވިއްކާލުމުގެ މުއާމަލާތް ނިމުމަކަށް އަންނާނެ ކަމަށާއި އެހާތަނަށް އެ ކުލަބުގެ ޑިމާންޑާ އެއްވަރުގެ އަގެއް ނުލިބިއްޖެނަމަ ކުޅުންތެރިޔާ ވިއްކާލުމަށް ހުޅުވި ދޮރު މުޅިން ބަންދުވާނެ ކަމަށެވެ.
ޗެލްސީން އެންޒޯ ވިއްކާލަން ވިސްނަން ފެށީ ކުޅުންތެރިޔާވެސް ސިޓީއަށް ބަދަލުވުމުގެ ޝައުގުވެރިކަން ފާޅު ކުރުމުންނެވެ. ހުސްވި ސީޒަނުގެ މެދުތެރެއިން ސްޕޭނުގެ ރެއާލް މެޑްރިޑުން ވެސް އޭނާ އަށް ގަތުމަށް ޝައުގުވެރިވިއެވެ.
ކިޔުންތެރިންގެ ހިޔާލު