ކުޅިވަރާއި ޒުވާނުންނާ ބެހޭ ވުޒާރާގެ ސްޓޭޓް މިނިސްޓަރުގެ މަގާމުގައި ހުންނެވި އަބްދުއްލަތީފް އަހުމަދު އެ މަގާމުން ވަކިކުރައްވައިފިއެވެ.
މި ނިންމެވުމާ ގުޅޭގޮތުން ވާހަކަދައްކަވަމުން ލަތީފް ވަނީ ސިޔާސީ މަގާމުތައް މަދުކުރުމަށް ސަރުކާރުން ގެންގުޅޭ ސިޔާސަތުގެ ދަށުން އޭނާ މަގާމުން ވަކިކުރެއްވިކަން ކަށަވަރުކޮށްދެއްވާފައެވެ.
ކުރިން ޔޫތު މިނިސްޓްރީގެ ސްޓޭޓް މިނިސްޓަރުކަން ކުރެއްވި ލަތީފް، ސަރުކާރުގެ ވުޒާރާތަކަށް ގެނައި ބަދަލުތަކާއެކު ފަހުން ބަދަލުކުރެއްވީ ސްޕޯޓްސް މިނިސްޓްރީގެ ސްޓޭޓް މިނިސްޓަރުގެ މަގާމަށެވެ. މީގެ އިތުރުން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އޭނާ ވަނީ ކްލެމެންސީ ބޯޑުގެ މެންބަރުކަންވެސް ކުރައްވާފައެވެ.
މީގެއިތުރުން އޭނާ ވަނީ މޯލްޑިވްސް މީޑިއާ ކައުންސިލްގެ މެންބަރުކަން ވެސް ކުރައްވާފައެވެ.
ލަތީފް މަގާމުން ވަކިކުރައްވާފައި މިވަނީ ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި އަބްދުﷲ ފައިރޫޝްވެސް ވަނީ މަގާމުން އިސްތިއުފާ ދެއްވާފައިވާ ދަނޑިވަޅެއްގައެވެ. މަގާމުން އިސްތިއުފާދެއްވުމަށްފަހު ފައިރޫޝް ވިދާޅުވީ އެއީ އާންމު ޚިދުމަތުގެ އެ ބާބު ނިންމާލަން އެންމެ ރަނގަޅު ވަގުތު ކަމަށް ގަބޫލުކުރައްވާތީ ނިންމެވި ނިންމެވުމެއް ކަމަށެވެ.
ކިޔުންތެރިންގެ ހިޔާލު