ދިވެހިރާއްޖޭގެ ސިއްހީ ނިޒާމު ހަރުދަނާކޮށް ފެންވަރު ރަނގަޅު ބޭސް ރާއްޖޭގެ ހުރިހާ ސަރަހައްދަކަށް ފަސޭހަކަމާއެކު ފޯރުކޮށްދިނުމަށްޓަކައި، ސްޓޭޓް ފާމަސިއުޓިކަލް އެންޑް މެޑިކަލް ސަޕްލައި ކޯޕަރޭޝަން (ސްޓޭޓް ފާމާ) އިން ދުނިޔޭގެ މަޝްހޫރު ފާމަސިއުޓިކަލް ކުންފުންޏެއް ކަމަށްވާ އެޗްޕީއެލްއާއެކު ޚާއްސަ ޑިސްޓްރިބިއުޝަން އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމަކީ ރާއްޖެއަށް ބޭނުންވާ ފެންވަރު ރަނގަޅު ބޭސް މެދުކެނޑުމެއްނެތި ލިބޭނެ މަގު ފަހިކުރުމަށްޓަކައި އެޅުނު މުހިންމު ފިޔަވަޅެކެވެ. މީގެ އިތުރުން މިއީ ރާއްޖޭގައި ބޭސް ފޯރުކޮށްދިނުމުގެ ނިޒާމު ޒަމާނީ ފެންވަރަށް ހަރުދަނާކުރުމަށްޓަކައި ކުރެވޭ މަސައްކަތުގެ ބައެކެވެ.
މި އެއްބަސްވުމުގެ ސަބަބުން ސްޓޭޓް ފާމާގެ ބައިނަލްއަގުވާމީ ސަޕްލަޔަރުންގެ ވިއުގަ އިތުރަށް ވަރުގަދަވެގެންދާނެއެވެ. އަދި ރާއްޖޭގެ ބޭހުގެ ސަޕްލައި ޗެއިން މަރުހަލާތައް އިތުރަށް ހަރުދަނާވެގެންދާނެ ކަމަށް އެ ކުންފުނިން ހާމަކުރެއެވެ.
ސްޓޭޓް ފާމާއިން ސިފަކުރާ ގޮތުގައި މިއީ އަސާސީ ބޭސްތައް ރައްޔިތުންނަށް ފަސޭހަކަމާއެކު ފޯރުކޮށްދިނުމަށް ލިބުނު ބޮޑު ކުރިއެރުމެކެވެ. މީގެ އިތުރުން ފެންވަރު ރަނގަޅު ފާމަސޫޓިކަލް އުފެއްދުންތައް ރާއްޖޭގެ މާކެޓަށް ތައާރަފުކުރުމަށް ކުރާ މަސައްކަތަށް މީގެ ސަބަބުން ބޮޑު އެހީތެރިކަމެއް ލިބިގެންދާނެއެވެ.
އެޗްޕީއެލްއަކީ ބައިނަލްއަގުވާމީ ބާޒާރުގައި ބޮޑު އިތުބާރެއް ހޯދާފައިވާ މަޝްހޫރު ކުންފުންޏެކެވެ. އެ ކުންފުނީގެ އުފެއްދުންތައް މިހާރުވެސް ދުނިޔޭގެ 32 އަށްވުރެ ގިނަ ގައުމަށް އެކްސްޕޯޓް ކުރެއެވެ. މީގެ ތެރޭގައި ޔޫރަޕް، އޭޝިއާ، އެފްރިކާ އަދި އެމެރިކާގެ ގައުމުތައް ހިމެނެއެވެ.
އެޗްޕީއެލްއިން ވަނީ ދާދިފަހުން ވިލާތުގެ އެންމެ ބޮޑު އެއް ބޭސް އުފައްދާ ކުންފުނި ކަމަށްވާ އެސްޓްރާޒެނެކާއާއެކުވެސް އެއްބަސްވުމެއް ހަދާފައެވެ. މިފަދަ ބައިނަލްއަގުވާމީ ބޮޑެތި ކުންފުނިތަކާއެކު ގުޅުން ގާއިމުކުރުމަކީ ރާއްޖޭގެ ސިއްހީ ދާއިރާގެ ކުރިއެރުމަށް އެޅޭ މުހިންމު ފިޔަވަޅެކެވެ.
ކިޔުންތެރިންގެ ހިޔާލު