ފަހިދިރިއުޅުން ކޯޕަރޭޝަނުން ހުޅުމާލޭ ފޭސް ދޭއްގައި ތަރައްޤީކޮށްފައިވާ ހައުސިން ޓަވަރުތަކުގައި ދިރިއުޅޭ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ސީސީޓީވީ ކެމެރާ ހަރުކުރުމަށް ހިންގާ މަޝްރޫޢުގެ ބޮޑުބައި މިހާރު ނިމިފައިވާކަން އެ ކުންފުނިން ހާމަކޮށްފިއެވެ.
އެ ކޯޕަރޭޝަނުން މަޢުލޫމާތު ދޭ ގޮތުގައި، “އަމާން ދޯދި” އަދި “އަމާން އުދަރެސް” ޓަވަރުތަކުގައި ކެމެރާ ހަރުކުރުމުގެ މަސައްކަތް ދަނީ ވަރަށް ބާރު ދުވެލީގައި ކުރިއަށެވެ. މިއީ އެ ސަރަހައްދުގައި ދިރިއުޅޭ އާއިލާތަކުގެ ރައްކާތެރިކަން އިތުރުކުރުމަށްޓަކައި އިސްކަންދީގެން ކުރިއަށްގެންދާ މުހިންމު މަސައްކަތެކެވެ.
މި މަޝްރޫޢުގެ ދަށުން “އަމާން ދޯދި” ޓަވަރުތަކުގައި ސީސީޓީވީ ކެމެރާ ހަރުކުރުމުގެ ނުވަދިހަ އިންސައްތަ މަސައްކަތް މިހާރު ވަނީ ފުރިހަމަކުރެވިފައެވެ. އަދި “އަމާން އުދަރެސް” ޓަވަރުތަކުގައި ކެމެރާ ހަރުކުރުމުގެ ނުވަދިހަ ފަސް އިންސައްތަ މަސައްކަތް ނިމިފައިވާކަމަށް އެ ކުންފުނިން ބުނެއެވެ.
ކެމެރާ ހަރުކުރުމުގެ މަސައްކަތް އެއްކޮށް ނިމި، ސީސީޓީވީ ނެޓްވޯކުގެ އޮޕަރޭޝަންތައް މުޅިން ފެށުމުން، އެ ސަރަހައްދުގެ ސަލާމަތީ ކަންކަން ބެލެހެއްޓުމަށާއި އެނޫންވެސް އާންމު ކަންކަމުގައި ބޮޑެތި ފަސޭހަތަކެއް ލިބިގެންދާނެއެވެ. ކެމެރާ ނެޓްވޯކުގެ އިތުރުން ޓަވަރުތަކުގެ ސެކިއުރިޓީ ބެލެހެއްޓުމަށް އިތުރު ވަސީލަތްތައްވެސް ޤާއިމުކުރުމަށް ދަނީ މަސައްކަތް ކުރަމުންނެވެ.
ގެދޮރުވެރިޔާ ސްކީމުގެ ދަށުން ހުޅުމާލޭ ފޭސް ދޭއްގައި ފަހިދިރިއުޅުން ކޯޕަރޭޝަނުން ތަރައްޤީކުރި ހަތަރު ހާސް ހައުސިން ޔުނިޓްތައް އެ ތަންތަނުގެ ވެރިފަރާތްތަކާ ހަވާލުކުރުމުގެ މަސައްކަތް ފަށާފައިވަނީ ވޭތުވެދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. ކުރީގެ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ތަރައްޤީކުރި އެ ޓަވަރުތަކުގެ ގިނަ އެޕާޓްމަންޓްތަކުގައި މިހާރު ވަނީ މީހުން ދިރިއުޅެން ފަށާފައެވެ.
އެ ސަރަހައްދުގައި މީހުން ދިރިއުޅެން ފެށިނަމަވެސް، އާންމުންނަށް އެންމެ ދަތިވާ އެއްކަމެއްގެ ގޮތުގައި ފާހަގަކުރެވެނީ ވެހިކަލްތައް ޕާކުކުރުމުގެ މައްސަލައެވެ. މީގެ އިތުރުން، އެ ތަންތަނުގައި ދިރިއުޅޭ ކުޑަކުދިން ކުޅެލައި ހަމަޖެހިލާނެ ޕާކެއް ނެތުމުގެ މައްސަލައަކީވެސް އާއިލާތަކުން ކަންބޮޑުވުން ފާޅުކުރަމުންދާ ކަމެކެވެ.
ކިޔުންތެރިންގެ ހިޔާލު