ލ. މާމެންދޫގެ ކަނބަލުންނަށް އަމާޒުކޮށް ދިވެހި ސިފައިންގެ ސެންޓްރަލް އޭރިއާ ކޮމާންޑާއި އެ ރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެން ހިންގި “މޫދު ކަސްރަތު” ޕްރޮގްރާމް ނިންމާލައިފިއެވެ.
ޖުލައި 18 އިން އޮގަސްޓް 3 އަށް ލ. މާމެންދޫ ބީޗު ސަރަހައްދުގައި ކުރިއަށްގެންދިޔަ މި ޕްރޮގްރާމް 18 ކަނބަލަކު ފުރިހަމަކޮށްފައިވެއެވެ. ޕްރޮގްރާމުގެ ކުލާސްތައް ނަންގަވައިދެއްވީ ދިވެހި ސިފައިންގެ ސެންޓްރަލް އޭރިއާ ކޮމާންޑުގެ މުދައްރިބުންނެވެ.
ޕްރޮގްރާމް ނިންމައިލުމުގެ ރަސްމިއްޔާތު ރޭ ލ. މާމެންދޫ ސްކޫލުގައި ބާއްވާފައިވާ އިރު އެ ރަސްމިއްޔާތު ޝަރަފުވެރިކޮށްދެއްވީ ސެންޓްރަލް އޭރިއާ ކޮމާންޑުގެ ކޮމާންޑަރ ބްރިގޭޑިއަރ ޖެނެރަލް މުހައްމަދު އިބްރާހީމެވެ. މި ރަސްމިއްޔާތުގައި ޕްރޮގްރާމުން ވަނަ ހާސިލުކުރި ފަރާތްތަކަށް ހަނދާނީ ފިލައާއި ލިޔުން ވަނީ ހަވާލުކޮށްދެއްވާފައެވެ. ރަސްމިއްޔާތުގައި އެ ކޮމާންޑުގެ އޮޕަރޭޝަންސް އެންޑް ޓްރެއިނިންގ އޮފިސަރ ކެޕްޓަން ސިއުތު މުހައްމަދާއި ޕްރޮގްރާމުގެ މުދައްރިބުން ބައިވެރިވެލެއްވިއެވެ.
މި ޕްރޮގްރާމަކީ ރައްޔިތުންގެ ދުޅަހެޔޮކަމާއި ސިއްހަތު ރަނގަޅުކުރުމުގެ އިތުރުން އެކުވެރިކަމާ އެކު ގުޅިގެން މަސައްކަތްކުރާ އެއްބައެއްވަންތަ މުޖުތަމައެއް ބިނާކުރުމުގެ މަގުސަދުގައި ދިވެހި ސިފައިން ހިންގި ޕްރޮގްރާމެކެވެ.
ކިޔުންތެރިންގެ ހިޔާލު