ހުޅުމާލެ ފޭސް ދޭއްގެ މޫދު ހިމެނޭ ސަރަހައްދުގައި ހިންދޫންގެ އަޅުކަމެއްކޮށް އެ ވީޑިއޯ އާންމުކުރި މައްސަލައިގައި ނޭޕާލަށް ނިސްބަތްވާ އަންހެނަކު ދިވެހި ފުލުހުންގެ ޚިދުމަތުން ހައްޔަރުކޮށްފިއެވެ.
މި ވީޑިއޯގެ މައްސަލަ ފުލުހުންގެ ސަމާލުކަމަށް އައުމާއެކު އެ މައްސަލަ ވަނީ ޚާއްސަ އިސްކަމެއް ދީގެން ބަލަން ފަށާފައެވެ. ފުލުހުން ބުނި ގޮތުގައި އެ އަންހެން މީހާ ދެނެގަނެ އޭނާ ހައްޔަރުކޮށްފައިވަނީ މީގެ ދެ ދުވަސް ކުރީންނެވެ.
ހައްޔަރުކުރި އުމުރުން 44 އަހަރުގެ މި އަންހެން މީހާއަކީ ރާއްޖޭގައި ގަވާއިދާ ހިލާފަށް އުޅެމުންދިޔަ މީހެކެވެ. އޭނާ ރާއްޖެ އައިސްފައިވަނީ 2024 ވަނަ އަހަރުގެ ތެރޭގައެވެ.
އެ އަންހެން މީހާއާމެދު ގާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި މިހާރު ވަނީ މޯލްޑިވްސް އިމިގްރޭޝަނާ ހަވާލުކޮށްފައެވެ.
ދިވެހިރާއްޖެއަކީ ސައްތައިންސައްތަ އިސްލާމީ ގައުމަކަށްވާއިރު، ރާއްޖޭގެ އާންމު ތަންތަނުގައި އިސްލާމްދީން ނޫން އެހެން ދީންތަކުގެ އަޅުކަން ކުރުމާއި އެފަދަ ކަންކަން އިޝްތިހާރު ކުރުމަކީ ގާނޫނުން މަނާކޮށްފައިވާ ކަމެކެވެ.
ކިޔުންތެރިންގެ ހިޔާލު