މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އިން ހިފާފައިވާ ތިން ރަށެއްގެ ހެޑްލީސް ރައިޓްސް ނުވަތަ ކުލީގެ ހައްގުތައް ވިއްކާލަން އުޅޭކަމަށް ދެކެވޭ ވާހަކަތައް އެ ކުންފުނިން މިއަދު ދޮގުކޮށްފިއެވެ.
އެމްޓީޑީސީން މިކަން ސާފުކޮށްދީފައި މިވަނީ ހދ. ނާގޯށި، ގދ. މަގުދޫވާ އަދި ބ. ކިހަވައް ހުރަވަޅީގެ ހެޑްލީސް ރައިޓްސް ބާޒާރުގެ އަގަށްވުރެ ހެޔޮކޮށް ވިއްކާލަން އުޅޭކަމަށް ބައެއް މީޑިއާތަކުގައި ހަބަރު ފެތުރިފައިވާ ދަނޑިވަޅެއްގައެވެ.
އެ ކުންފުނީގެ ބަޔާނުގައި ވިދާޅުވެފައި ވަނީ، ނާގޯއްޓާއި، މަގުދޫވާ އަދި ކިހަވައް ހުރަވަޅިއަކީ ދިވެހި ސަރުކާރާއެކު ވެފައިވާ ސައްހަ އެއްބަސްވުންތަކެއްގެ ދަށުން އެމްޓީޑީސީއަށް ދޫކޮށްފައިވާ ރަށްތަކެއް ކަމަށެވެ. އަދި އެ ރަށްތަކުގެ ގާނޫނީ ހުރިހާ ހައްގުތަކެއް އޮތީ އެމްޓީޑީސީގެ އަތުގައި ކަމަށްވެސް ބަޔާނުގައިވެއެވެ.
މީޑިއާތަކުގައި ފެތުރެމުންދާ ހަބަރުތަކަކީ އެއްވެސް އަސާސެއް ނެތް ދޮގު މައުލޫމާތުތަކެއްކަން ފާހަގަކޮށް، އެމްޓީޑީސީން ބުނީ ކުންފުނީގެ ހިއްސާދާރުންގެ މަސްލަހަތު ހިމާޔަތްކުރުމަށާއި، ކުންފުނި ހިންގުމުގެ އެންމެ މަތީ މިންގަނޑުތައް ހިފެހެއްޓުމަށް އެ ކުންފުނިން އަބަދުވެސް މަސައްކަތް ކުރާނެ ކަމަށެވެ. އަދި ޕަބްލިކް ލިސްޓެޑް ކުންފުންޏެއްގެ ހައިސިއްޔަތުން، ކުންފުންޏާ ގުޅުންހުރި މުހިންމު ކަންކަން ގަވާއިދުން ހާމަކުރަމުންދާނެ ކަމުގެ ޔަގީންކަންވެސް ވަނީ ދީފައެވެ.
އެހެންކަމުން، ކުންފުނީގެ ހިއްސާދާރުންނާއި އާންމު ރައްޔިތުން، ކުންފުންޏާ ގުޅޭ ރަސްމީ މައުލޫމާތު ހޯދުމުގައި އެމްޓީޑީސީގެ ރަސްމީ އިޢުލާންތަކަށް އެކަނި ބަރޯސާވުމަށް އެ ކުންފުނިން ވަނީ އިލްތިމާސްކޮށްފައެވެ.
ކިޔުންތެރިންގެ ހިޔާލު