ބޭންކް އޮފް މޯލްޑިވްސް އިން ރާއްޖޭން ބޭރުގައި މަތީ ތަޢުލީމާއި ޕްރޮފެޝަނަލް ކޯސްތައް ފުރިހަމަކުރާ ދަރިވަރުންނަށް އަމާޒުކޮށް، އެއްވެސް ރަހުނަކާ ނުލައި ސީދާ ޑޮލަރުން ފައިނޭންސް ދޫކުރާ އައު ކިޔަވާ ލޯނެއް މިއަދު ތަޢާރަފުކޮށްފިއެވެ.
މިއީ ބީއެމްއެލް އިން ދޫކުރަމުން އަންނަ ކިޔަވާ ލޯނާއި އެޑިއުކޭޝަން ފައިނޭންސިންއަށް ގެނައި މުހިންމު ބަދަލެކެވެ. މި ބަދަލާއެކު، ބޭރު ގައުމުތަކުގައި ޕްރޮފެޝަނަލް ކޯސްތައް ފުރިހަމަކުރުމަށާއި، އެފަދަ ކޯސްތަކާ ގުޅުންހުރި ސެޓްފިކެޓް ފީ ދެއްކުމަށް ސީދާ ޑޮލަރުން ފައިނޭންސް ލިބޭނެ އިންތިޒާމު މިހާރު ވަނީ ހަމަޖެހިފައެވެ. ބައިނަލްއަގުވާމީ ގޮތުން ބަލައިގަންނަ ޕްރޮފެޝަނަލް ތަމްރީނުތަކާއި ސަނަދުތައް ހާސިލުކުރަން ބޭނުންވާ ފަރާތްތަކަށް އަމާޒުކޮށްގެން ތަޢާރަފުކުރި މި ފައިނޭންސްގެ ދަށުން، ކޯސް ފީތައް ބޭންކުން ސީދާ ތަޢުލީމީ މަރުކަޒަކަށް ނުވަތަ ކަމާބެހޭ އިދާރާއަކަށް ޓެލެގްރަފިކް ޓްރާންސްފާ މެދުވެރިކޮށް ފޮނުވައިދޭނެއެވެ.
މީގެ އިތުރުން، ދަރިވަރުންނަށް ދޫކުރާ އެލަވަންސް ނުވަތަ ސްޓައިޕެންޑް ސީދާ ކަސްޓަމަރުގެ އެކައުންޓަށް ޖަމާކޮށްދޭނެ ކަމަށްވެސް އެ ބޭންކުން ބުނެފައިވެއެވެ. މި އިންތިޒާމުގެ ސަބަބުން ބޭރު ފައިސާގެ މުޢާމަލާތްތައް ކުރުމަށް ދަރިވަރުންނަށް ބޮޑު ފަސޭހައެއް ލިބި، މަސައްކަތްތައް ވަރަށް ބޮޑަށް އަވަސްވެގެންދާނެއެވެ.
ޑޮލަރުން ފައިސާ ދޭ ލޯނެއް ތަޢާރަފުކުރުމަކީ، ތަޢުލީމީ ބޭނުންތަކަށް ކަޅު ބާޒާރުން ޑޮލަރު ގަންނަން ޖެހުމުގެ ސަބަބުން އާންމުންނަށް ކުރިމަތިވެފައި އޮތް ބޮޑު މާލީ ގޮންޖެހުމަށް ލިބުނު ވަރަށް ބޮޑު ލުޔެކެވެ. ރާއްޖޭގެ އެންމެ ބޮޑު މާލީ އިދާރާގެ ހައިސިއްޔަތުން ބީއެމްއެލް އިން އަންނަނީ ދަރިވަރުންގެ ތަޢުލީމީ އުންމީދުތައް ހަގީގަތަކަށް ހެދުމަށް އީޖާދީ އަދި ފަސޭހައިން ލިބޭނެ މާލީ އެހީތެރިކަން ފޯރުކޮށްދެމުންނެވެ.
މިކަމާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިން ޑައިރެކްޓާ މުޙައްމަދު ޝަރީފް ވިދާޅުވެފައިވަނީ، ބޭންކުގެ ޚިދުމަތްތައް އިތުރަށް ހަރުދަނާކުރުމަށް ކުރަމުންދާ މަސައްކަތުގެ ތެރެއިން ކިޔަވާ ލޯނަށް މި ގެނައި ބަދަލަކީ ކަސްޓަމަރުންގެ ބޭނުންތަކަށް ރިއާޔަތްކޮށް ގެނައި ބަދަލެއް ކަމަށެވެ. އަދި ރަހުނަކާ ނުލައި ޑޮލަރުން ލިބޭ މި ފުރުސަތަކީ މަތީ ތަޢުލީމާއި ޕްރޮފެޝަނަލް ސަނަދުތައް ހާސިލުކުރަން ބޭނުންވާ ފަރާތްތަކަށް ލިބިގެންދާނެ ބޮޑު ލުޔެއް ކަމަށްވެސް އޭނާ ވިދާޅުވިއެވެ. ނަމަވެސް މި ލޯނު ދޫކުރާނެ އެންމެ މަތީ އަދަދާއި އިންޓްރެސްޓް ރޭޓްގެ ތަފުސީލުތައް ބޭންކުން އަދި ހާމަކޮށްފައެއް ނުވެއެވެ.
ކިޔުންތެރިންގެ ހިޔާލު