ހދ. ހިރިމަރަދޫން ހއ. ހޯރަފުއްޓަށް ބަދަލުވާން ބޭނުންވާ މީހުން ނަންނޯޓުކުރުމުގެ ފުރުސަތު ހަމަވާން ކުޑަ ދުވަސްކޮޅަކަށް ވެފައިވާއިރު، އެ ރަށުގެ ގިނަ ރައްޔިތުން އެކަމަށް ޝައުގުވެރިކަން ފާޅުކޮށްފައި ނުވާ ކަމަށް ހަނިމާދޫ ކައުންސިލުން ބުނެފިއެވެ.
އާބާދީގައި 589 މީހުން ހިމެނޭ ނަމަވެސް މިހާރު 200 އެއްހާ މީހުން ދިރިއުޅޭ ހިރިމަރަދޫ، މީހުން ދިރިއުޅޭ ރަށްތަކުގެ ލިސްޓުން އުނިކޮށް އެ ރަށުގެ ރައްޔިތުން ހަނިމާދުއަށް ބަދަލުކުރަން ނިންމަވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ގަރާރެއް ނެރުއްވާފައެވެ. މިއާއެކު ހަނިމާދޫ ކައުންސިލުގެ އިދާރީ ހިންގުމުގެ ދަށަށް ހިރިމަރަދޫ ބަދަލުކުރީ މިދިޔަ މެއި މަހުގެ 17ވަނަ ދުވަހުއެވެ.
ހޯރަފުއްޓަށް ބަދަލުވާން ބޭނުންވާ ފަރާތްތަކަށް ހޯރަފުށީ ކައުންސިލުން ދީފައިވާ ދައުވަތާ ގުޅިގެން ނަންނޯޓުކުރަން ހަނިމާދޫ ކައުންސިލުން 30 ދުވަހުގެ މުއްދަތެއް ދިނީ ޖޫން މަހުގެ 24ވަނަ ދުވަހުއެވެ. ނަމަވެސް ހަނިމާދޫ ކައުންސިލުގެ ނައިބު ރައީސް ފިރާޤް މުޙައްމަދު ވިދާޅުވި ގޮތުގައި، ސަރުކާރުން ހަނިމާދޫގައި ހިލޭ ގެ އަޅައިދޭ ގޮތަށް ހަމަޖެހިފައިވާއިރު، ހޯރަފުށިން އެފަދަ ޔަގީންކަމެއް ނެތި އެ ރަށަށް ބަދަލުވާން ހިރިމަރަދޫ ރައްޔިތުން ބޭނުމެއް ނުވެއެވެ. އަދި ހޯރަފުށިން ހައުސިން ޔުނިޓު ލިބޭނެތޯ ބައެއް ރައްޔިތުން ކައުންސިލާ ސުވާލުކޮށްފައިވާ ކަމަށްވެސް އޭނާ ވިދާޅުވިއެވެ.
މި މައްސަލައިގައި ހައުސިން މިނިސްޓަރު ޑރ. ޢަބްދުﷲ މުއްޠަލިބު ދާދިފަހުން ވިދާޅުވެފައިވަނީ ހަނިމާދޫގައި ހިރިމަރަދޫ ރައްޔިތުންނަށް ގެދޮރު އިމާރާތްކުރަން ހަނިމާދޫ ކައުންސިލުން އެއްބާރުލުން ނުދޭ ކަމަށެވެ. އެހެންނަމަވެސް ކައުންސިލުން ވަނީ އެކަން ދޮގުކޮށް، ހިރިމަރަދޫ ރައްޔިތުންނާ ބައްދަލުކުރުމަށް އެދި އެޗްޑީސީއަށް ސިޓީއެއް ފޮނުވާފައެވެ. ސަރުކާރުން ވަނީ ހިރިމަރަދޫގެ ކޮންމެ ގޯއްޗަކަށް ހަނިމާދޫން ގެއެއް އަޅައިދެއްވާނެ ކަމަށާއި، ގިނަވެގެން އަށާރަ މަސްދުވަހުގެ ތެރޭގައި އެ މަސައްކަތް ނިންމައި ހަވާލުކުރާނެ ކަމަށް ވައުދުވެފައެވެ.
ކިޔުންތެރިންގެ ހިޔާލު