މިހާރު ކުރިއަށްދާ ފީފާ ވޯލްޑް ކަޕަކީ އޭނާގެ ކެރިއަރުގައި ކުޅޭނެ އެންމެ ފަހު ވޯލްޑް ކަޕްކަމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފިއެވެ.
ރައުންޑް އޮފް 16 މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޯޗުގަލްގެ ތަރި ރޮނާލްޑޯ ބުނީ ޔަގީނުންވެސް މިއީ އޭނާގެ ފަހު ވޯލްޑް ކަޕް ކަމަށެވެ. އެހެންނަމަވެސް ގައުމީ ޓީމުން ރިޓަޔާކުރަން ނިންމާ ނިންމުމަކީ އަމިއްލައަށް ނިންމާނެ ނިންމުމެއް ކަމަށާއި އެއީ ވަކި ބަޔަކު ބުނެގެން ކުރާނެކަމެއް ނޫންކަމަށްވެސް އޭނާ ބުންޏެވެ.
މިހާރު އުމުރުން 41 އަހަރުގެ ރޮނާލްޑޯ އޭނާއަކީ މީގެ އަހަރުތަކެއް ކުރިން ހުރި ފެންވަރުގައި ހުރި ކުޅުންތެރިއެއް ނޫން ކަމަށް އެއްބަސްވާންޖެހޭ ކަމަށާއި އެހެންނަމަވެސް އޭނާ އަކީ އެހާ ދަށް ކުޅުމެއް ކުޅެމުން އަންނަ ކުޅުންތެރިއެއް ވެސް ނޫން ކަމަށެވެ.
މިފަހަރުގެ ވޯލްޑް ކަޕްގައި މިރޭ ގަދަ 16 ބުރުގައި ޕޯޗުގަލް އިން ސްޕެއިނާ ދެކޮޅަށް ނުކުންނާނެއެވެ. ގައުމީ ޓީމަށް ކުޅެން ފެށިތާ 18 ވަރަކަށް އަހަރު ވެފައިވާއިރު، މި މުއްދަތުގެ ތެރޭގައި އަބަދުވެސް މަސައްކަތްކުރީ ޓީމުގެ ހައްގުގައި ކަމަށް ރޮނާލްޑޯ ބުންޏެވެ. އަދި، މެޗުތަކުގައި ކުުޅުނަސް އަދި ނުުކުޅުނަސް އޭނާގެ ބައިވެރިވުން ޕޯޗުގަލް ޓީމަށް ބޭނުންވާނެ ކަމަށް ރޮނާލްޑޯގެ ވާހަކައިގައި ފާހަގަކޮށްފައިވެއެވެ.
އުމުރުން 41 އަހަރު ފުރިފައިވާއިރުވެސް އޭނާ ފުރަތަމަ އެގާރައިގައި ހިމެނިގެން ކުޅޭތީ ފާޑުކިޔަމުން އަންނަ ފަރާތްތަކުން، މިދިޔަ 23 އަހަރު ތެރޭގައި ވެސް މަސައްކަތްކުރީ އެކި ގޮތްގޮތަށް ވާހަކަ ދައްކައިގެން އޭނާގެ ހިތްމަރާލުމަށް ކަމަށް ރޮނާލްޑޯ ވަނީ ބުނެފައެވެ.
ފުޓްބޯޅަ ކެރިއަރާ މެދު ހުރިހާ ގޮތެއް ކަނޑައެޅޭނީ އޭނާ ފީފާ ވޯލްޑް ކަޕް ކާމިޔާބު ކުރުމުންކަމަށް ބުނެ ދެކެވޭ ވާހަކަތަކަކީ، އެއްވެސް ތާކުންތާކު ޖެހޭ ވާހަކައެއް ނޫންކަމަށް ރޮނާލްޑޯ ބުންޏެވެ.
ޕޯޗުގަލްގެ ޖާޒީގައި ރޮނާލްޑޯ ކުޅުނު ފުރަތަމަ ވޯލްޑް ކަޕަކީ 2006 ވަނަ އަހަރުގެ ވޯލްޑް ކަޕެވެ. އެފަހުން 2010، 2014 އަދި 2018 އާއި 2022 ވަނަ އަހަރުގައި ވެސް ކުޅެފައިވާ ރޮނާލްޑޯ ވަނީ، މިފަހަރުގެ މުބާރާތުގެ ގްރޫޕް ސްޓޭޖުގައި ޖެހި ލަނޑުތަކާއެކު، ފީފާ ވޯލްޑް ކަޕުގެ ހަ މުބާރާތެއްގައި ލަނޑުޖެހި ހަމައެކަނި ކުޅުންތެރިޔާގެ ޝަރަފުވެސް ހޯދާފައެވެ. ރޮނާލްޑޯ އެންމެފުރަތަމަ ޤައުމީ ޓީމަށް މެޗެއް ކުޅެދިނީ 2003 ވަނަ އަހަރުއެވެ. ވޯލްޑް ކަޕުގައި ރޮނާލްޑޯގެ ފުރަތަމަ ލަނޑު ފެނިގެންދިޔައީ 2006 ވަނަ އަހަރުގެ މުބާރާތުގައި އީރާނާ ދެކޮޅަށް ކުޅެ 0-2 އިން ޕޯޗުގަލް މޮޅުވި މެޗުގައެވެ.
ކިޔުންތެރިންގެ ހިޔާލު