މި ދުވަސްވަރު 8،000 އެއްހާ ދަރިވަރުން ގަަވާއިދުން ސުކޫލަށް ނުދާކަމަށް އެޑިޔުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.
މިދިޔަ އަހަރުގެ ކީސްޓޭޖް ތިނެއްގެ ނެޝަނަލް އެސެސްމަންޓް އޮފް ލާނިން އައުޓްކަމްސް ރިޕޯޓު އާންމު ކުރުމަށް ބޭއްވި ރަސްމިއްޔާތުގައި މިނިސްޓަރު ވިދާޅުވީ، އެކަށީގެންވާ މިންވަރެއްގައި ދަރިވަރުންގެ ނަތީޖާ ހިފެހެއްޓުމަށް ސުކޫލަށް ހާޒިރުވުން މުހިންމު ކަމަށެވެ.
މިނިސްޓަރު ވިދާޅުވީ މިދިޔަ މަހުގެ 21އިން ފެށިގެން ކޮންމެ ދުވަހަކު ވެސް، ސުކޫލަށް ހާޒިރުވާ ދަރިވަރުންނާއި، ހާޒިރުނުވާ ދަރިވަރުން ފާހަގަކުރަން ފަށާފައިވާ ކަމަށެވެ.
“އަޅުގަނޑުމެން ބެލެނިވެރިން، މުދައްރިސުން، އެންމެންގެ ލެވެލްގައި ވެސް މިކަމާ ދޭތެރޭ ވިސްނަން އެބަޖެހޭ. ޚާއްސަކޮށް ބެލެނިވެރިން ވިސްނަން އެބަޖެހޭ. އެނގޭ މިއީ ވޯލްޑްކަޕް ދުވަސްވަރުކަން. އެހެން ނަމަވެސް އަށެއްކަ ހާސް ދަރިވަރުން ސްކޫލަށް ނުދިއުމަކީ އެއީ އަޅުގަނޑުމެން ކަންބޮޑުވާ ކަމެ،” މިނިސްޓަރު ވިދާޅުވިއެވެ.
މި ދުވަސްވަރު ސުކޫލަށް ހާޒިރުނުވާ ދަރިވަރުން އެންމެ ގިނައީ މާލެ ސަރަހައްދުގައި ކަމަށް ވެސް މިނިސްޓަރު ވިދާޅުވިއެވެ. އެގޮތުން، މާލެ ސަރަހައްދުގެ ސުކޫލުތަކުގެ 40 އިންސައްތަ ދަރިވަރުން ސުކޫލަށް ނުދާކަމަށް ވިދާޅުވިއެވެ.
ކިޔުންތެރިންގެ ހިޔާލު