މިހާރު ކުރިއަށްދާ ފީފާ ވޯލްޑް ކަޕުން އުރުގުއޭ ކެޓުމުން އެއުމުގެ ފުޓްބޯޅަ ފެޑެރޭޝަނުން ހަމަޖެއްސި ޗާޓަރު ފްލައިޓް ކެންސަލްކޮށް، ކުޅުންތެރެިން އަމިއްލަ ޚަރަދުގައި ޤައުމަށް އައުމަށް އަންގައިފިއެވެ.
ދުނިޔޭގެ ޗެމްޕިއަންކަން ދެފަހަރު ހޯދާފައިވާ އުރުގުއޭ ގްރޫޕް އެޗްގައި ތިންވަނައަށްގޮސް މުބާރާތާ ވަނީ ވަކިވެފައެވެ. ގިނަ ބަޔަކަށް ހީވެފައި އޮތީ ސްޕެއިން ހިމެނޭ އެ ގްރޫޕްގެ ދެވަނަ އުރުގުއޭއަށް ލިބޭނެކަމށެވެ. ފޭވަރިޓެއްގެ ގޮތުގައި އޮތް އުރުގުއޭއަށް ގްރޫޕް ސްޓޭޖު ނިންމާލަން ޖެހުނީ އެއްވެސް ޓީމެއް ކައިރިން މޮޅު ނުވެއެވެ. މުޅިން އަލަށް ވޯލްޑް ކަޕްގައި ވާދަކުރާ ކުޑަކުޑަ ޤައުމެއްކަމަށްވާ ކޭޕް ވާޑްއާއި ސައުދީ އަރަބިއާ އަތުންވެސް އުރުގުއޭއަށް މޮޅެއް ނުވެވުނެވެ.
ރެއާލް މެޑްރިޑްގެ މިޑްފީލްޑަރު ފެޑެރީކޯ ވަލްވާޑޭ އާއި ލިވަޕޫލްގެ ފޯވާޑް ޑާވިން ނޫނޭޒްފަދަ މަޝްހޫރު ކުޅުންތެރިން ހިމެނޭ އުރުގުއޭ މުބާރަތަށް އައީ ރަނގަޅު ކާމިޔާބީއެއް ހޯދޭނެކަމުގެ އުންމީދުގައެވެ. މުބާރާތައް އައީވެސް ފުޓްބޯޅަ ފެޑެރޭޝަނުން ހަމަޖެއްސި ޗާޓަރު ފްލައިޓުގައެވެ. ނަމަވެސް މުބާރާތުން ރަނގަޅު ނަތީޖާއެއް ހޯދާނެކަމަށް ހީކޮށް، ރަނގަޅު އިންތިޒާމުތަކެއް ޓީމަށް ހަމަޖައްސާފައި އޮތުމަށްފަހު ޓީމު މުބާރާތުން ކެޓުމުން ފެޑެރޭޝަނުން ވަނީ ޗާޓަރު ފްލައިޓު ކެންސަލްކޮށްފައެވެ.
މީޑީއާ ރިޕޯޓުތައް ބުނާގޮތުގައި ޓީމު އެނބުރި ޤައުމަށް ދިއުމަށް އާންމު ފްލައިޓުގައި ދަތުރުކުރުމަށް ވަނީ އަންގާފައެވެ. އަދި ޚަރަދު ކުރަންވެސް ޖެހޭނީ ކުޅުންތެރިން އަމިއްލައަށްކަމަށްވެސް ފުޓްބޯޅަ ފެޑެރޭޝަނުން އަންގާފައިވާކަމަށް ރިޕޯޓުތައް ބުނެއެވެ.
ކިޔުންތެރިންގެ ހިޔާލު