މަސްތުވާތަކެތީގެ ވިޔަފާރިކުރާ ފަރާތްތަކަށް އަމާޒުކޮށް ފުލުހުންގެ މަސައްކަތް އިތުރަށް ހަރުދަނާކޮށް، ކުރިއަށް މިއޮތް އަހަރަކީ ކާމިޔާބު ނަތީޖާތަކެއް ނެރޭނެ އަހަރަކަށް ހައްދަވާނެކަމަށް ވަޒީރު ޢަލީ އިޙްސާން ވިދާޅުވެއްޖެއެވެ.
ފުލުހުންގެ 93 ވަނަ އަހަރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާއި ބެހޭ ވަޒީރު ވިދާޅުވީ، ގޭންގުތައް ހަދައިގެން ރަށުތެރޭގެ އަމާންކަން ނަގާލަން މަސައްކަތްކުރާ ކުދިން އެ މާހައުލުން ދުރުކުރުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ. އަދި ކުރިއަށް އޮތް އަހަރަކީ އެފަދަ ކުދިން މުޖުތަމައުގައި އަބުރުވެރިކަމާއެކު ދިރިއުޅުމުގެ ފުރުސަތު ހޯދައިދެވޭނެ އަހަރެއްކަމުގައި ވެގެންދާނެކަން އެ މަނިކުފާނު ފާހަގަކުރެއްވިއެވެ.
ކުރިއަށް އޮތް އަހަރުގެ ތެރޭގައި ގަވާއިދާ ހިލާފަށް ވިޔަފާރިކުރާ ބިދޭސީންނާއި، މައުލޫމާތު ނުދީ ފިލައިގެން އުޅޭ ދެހާހެއްހާ ބިދޭސީން ހޯދައި ރާއްޖެއިން ޑީޕޯޓުކުރުމަށް ހާއްސަ މަސައްކަތްތަކެއް ފުލުހުން ކުރިއަށް ގެންދާނެ ކަމަށް ވަޒީރު ވިދާޅުވިއެވެ. މީގެ އިތުރުން، އަމާންކަން ބެލެހެއްޓުމަށްޓަކައި ޓެކްނޮލޮޖީގެ އެހީގައި ފުލުހުންގެ އޮފިސަރުން މިހާރަށްވުރެ ގިނައިން މަގުމަތިން ފެނިގެންދާނެ ކަމަށާއި، މިއަންނަ އަހަރަކީ ފުލުހުންގެ ހިދުމަތުގެ އިތުރު ރަން އަހަރަކަށް ވެގެންދާނެކަމަށްވެސް އެ މަނިކުފާނު ވިދާޅުވިއެވެ.
ފުލުހުންގެ މުއައްސަސާއަށް ރައްޔިތުން ކުރައްވާ އިތުބާރަށް އަލިއަޅުއްވާލައްވަމުން ވަޒީރު ޢަލީ އިޙްސާން ވިދާޅުވީ، މުއައްސަސާގެ އެންމެ އަގުބޮޑު ރައުސުލްމާލަކީ ދިވެހި ރައްޔިތުން ކުރާ އިތުބާރު ކަމަށެވެ. މި އިތުބާރު ދެމިއޮންނާނީ ފުލުހުންގެ އިންޓެގްރިޓީއާއި، ހަމަހަމަކަމާއި، ޒިންމާދާރުކަމުގެ އިތުރުން ޕްރޮފެޝަނަލިޒަމް އާއި ރައްޔިތުންނަށް ދެވޭ އިހުތިރާމެއްގެ މައްޗަށް ކަމަށް ވިދާޅުވިއެވެ. ރައްޔިތަކާ ކުރެވޭ ކޮންމެ ޕޮޒިޓިވް މުއާމަލާތަކުންނާއި، އިންސާނިއްޔަތުކަމާއެކު ދިއްކޮށްލާ ކޮންމެ އަތަކުން އަދި އިންސާފުވެރި ކޮންމެ ނިންމުމަކުން އެ އިތުބާރު އިތުރަށް ވަރުގަދަވެގެންދާނެ ކަމަށް ވަޒީރު ފާހަގަކުރެއްވިއެވެ. ވާހަކަފުޅު ނިންމަވާލައްވަމުން، މި ކަންކަމަށް ސަމާލުކަންދީގެން މަސައްކަތްތައް ބައްޓަންކުރުމަށް ހުރިހާ ފުލުހުންނަށް ވަޒީރު ވަނީ ގޮވާލައްވާފައެވެ.
ކިޔުންތެރިންގެ ހިޔާލު