މ. މުލީގައި ގާއިމުކުރާ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތުގެ 70 އިންސައްތަ ނިމި، އެ ރަށުގެ ކުޅިވަރުގެ ވަސީލަތްތައް ތަރައްގީކުރުމުގެ މަސައްކަތް ބާރު ސްޕީޑުގައި ކުރިއަށްދާކަން ޒުވާނުން ބާރުވެރިކުރުމާއި، ކުޅިވަރާއި ހަށިހެޔޮކަމާ ބެހޭ ވުޒާރާއިން ހާމަކޮށްފިއެވެ.
ޒުވާނުން ބާރުވެރިކުރުމާއި، ކުޅިވަރާއި ހަށިހެޔޮކަމާ ބެހޭ ވުޒާރާއިން މައުލޫމާތު ދެއްވި ގޮތުގައި، އެ ވުޒާރާގެ ވަޒީރު އަބްދުﷲ ރާފިއު ވަނީ މުލީގައި މިހާރު ކުރިއަށްދާ ކުޅިވަރު މަޝްރޫއުތައް ބައްލަވާލައްވައި، މަސައްކަތްތަކުގެ ފެންވަރާއި ކުރިއެރުމާ ގުޅޭގޮތުން މައުލޫމާތު އޮޅުންފިލުއްވާފައެވެ. މި މަޝްރޫއުގެ ތެރެއިން އެންމެ ބާރު ސްޕީޑުގައި ކުރިއަށްދާ އެއް މަސައްކަތަކީ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތްކަމަށްވާއިރު، މިހާރު އޭގެ 70 އިންސައްތަ ނިމިފައިވާކަމަށް އެ ވުޒާރާއިން ބުނެއެވެ.
ފިޓްނަސް ސެންޓަރުގެ އިތުރުން، މުލީގައި ގާއިމުކުރާ ކުޅިވަރުގެ އެހެނިހެން ވަސީލަތްތަކުގެ މަސައްކަތްތައްވެސް ހަލުވިކަމާއެކު ކުރިއަށްދާކަން ފާހަގަކުރެވެއެވެ. އެގޮތުން، ރަށުގެ އައުޓްޑޯ ޖިމްގެ މަސައްކަތްތަކާއި ފުޓްބޯޅަ ދަނޑުގައި ޓާފް އެޅުމުގެ މަސައްކަތްތައް މިހާރުވަނީ ނިމިފައެވެ. ފުޓްބޯޅަ ދަނޑުގެ ބާކީ ހުރި މަސައްކަތްތަކުގެ ތެރޭގައި ހިމެނެނީ ފެންސް ޖެހުމާއި، ދަނޑަށް ބޭނުންވާ ލައިޓިން ނިޒާމު ހަރުކުރުމުގެ މަސައްކަތެވެ.
ރާއްޖޭގެ ކޮންމެ ރަށެއްގައިވެސް ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ރައްޔިތުންގެ ދުޅަހެޔޮކަން އިތުރުކޮށް، ކަސްރަތުކުރުމަށް މަގުފަހިކޮށްދިނުމުގެ ގޮތުން ސަރުކާރުން ކުރިއަށްގެންދާ މި މަޝްރޫއުތަކަކީ ޒުވާނުންނާއި ރައްޔިތުންނަށް ދުޅަހެޔޮ ސިއްހަތެއްގައި ތިބުމަށް ހިތްވަރު ދިނުމަށް ކުރާ ބޮޑު އިންވެސްޓްމެންޓެއްކަމަށް ސަރުކާރުން ފާހަގަކުރައްވައެވެ.
ކިޔުންތެރިންގެ ހިޔާލު