މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ކުރިއަށް ގެންދާ ސީއެސްއާރު ގްރާންޓުގެ ދަށުން، 2 ލައްކަ ރުފިޔާއާ ހަމައަށް މާލީ އެހީތެރިކަން ހޯދުމުގެ ފުރުސަތު އެ އޮފީހުން ހުޅުވާލައިފިއެވެ.
މި ޕްރޮގްރާމަކީ ތަފާތު ދާއިރާތަކުން އިޖުތިމާއީ ފެންވަރުގައި ހިންގާ ހަރަކާތްތަކަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން ޕެންޝަން އޮފީހުން ކުރިއަށް ގެންދާ ހަރަކާތެކެވެ. މި މަސައްކަތުގެ މައިގަނޑު އަމާޒަކީ މުޖުތަމައުއަށް ފައިދާހުރި ހަރަކާތްތައް ކުރިއަށް ގެންދިޔުމަށް ހިތްވަރު ދިނުމާއި އެ ފަދަ މަޝްރޫއުތައް ކާމިޔާބުކަމާއެކު ހިންގުމަށް އެހީތެރިވުމެވެ.
ޕެންޝަން އޮފީހުން ހާމަކޮށްފައިވާ ގޮތުގައި، މި ގްރާންޓުގެ ދަށުން އެހީތެރިކަން ފޯރުކޮށްދިނުމަށް ހަމަޖެހިފައިވަނީ އަމިއްލަ ޖަމިއްޔާތަކާއި ތައުލީމާއި ތަމްރީނު ދޭ ފަރާތްތަކުން ހިންގާ ޕްރޮގްރާމްތަކަށެވެ. މީގެ އިތުރުން، މާލީ ހޭލުންތެރިކަން އިތުރުކުރުމުގެ ގޮތުން ހިންގާ ޕްރޮގްރާމްތަކަށް ވެސް މި އެހީގެ ދަށުން ފުރުސަތު ލިބިގެންދާނެއެވެ. ޕްރޮޕޯސަލް ހުށަހަޅާ ފަރާތްތަކުގެ ތެރެއިން ޝަރުތު ހަމަވާ ފަރާތްތަކަށް 2 ލައްކަ ރުފިޔާއާ ހަމައަށް މާލީ އެހީ ދިނުމަށް ވަނީ ކަނޑައަޅާފައެވެ.
މި ގްރާންޓަށް ޕްރޮޕޯސަލް ހުށަހެޅުމަށް ޝައުގުވެރިވާ ފަރާތްތަކަށް އެ ފުރުސަތު މިހާރު ވަނީ ހުޅުވާލާފައެވެ. ޕްރޮޕޯސަލް ހުށަހެޅުމުގެ އެންމެ ފަހުގެ ސުންގަޑިއަކީ އަންނަ ޖުލައި މަހުގެ 23 ވަނަ ދުވަހުގެ 16:00 އެވެ. މި މުއްދަތުގެ ކުރިން ޕްރޮޕޯސަލްތައް ހުށަހެޅުމަށް ޕެންޝަން އޮފީހުން އިލްތިމާސްކުރެއެވެ.
ކިޔުންތެރިންގެ ހިޔާލު