ކުޑަކުޑަ ކޭޕް ވާޑޭއިން ވޯލްޑުކަޕްގައި ކުޅުނު ދެވަނަ މެޗުގައި ވަރުގަދަ އުރުގުއޭވެސް ހިފަހައްޓައިފިއެވެ.
ވޯލްޑް ކަޕްގައި މުޅިން އަލަށް ވާދަކުރާ، އަދި މުބާރާތުގައި ބައިވެރިވި އެންމެ ކުޑަ އެއް ގައުމު ކަމަށްވާ ކޭޕް ވާޑޭއިން ވަނީ އެ ޓީމުން މުބާރާތުގައި ކުޅުނު ފުރަތަމަ މެޗުގައި ސްޕެއިންއާ އެއްވަރުކޮށް ޕޮއިންޓެއް ހޯދާފައެވެ. ކޭޕް ވާޑޭ އިން މެޗު އެއްވަރުކުރީ 2-2ގެ ނަތީޖާއަކުންނެވެ. ވާދަވެރި ކުޅުމެއް ދެ ޓީމުގެ ފަރާތުން ވެސް ފެނިގެންދިޔަ މި މެޗުގައި ފުރަތަމަ ލަނޑުޖަހައި ލީޑުނެގީވެސް ކޭޕް ވާޑޭއިންނެވެ. ފުރަތަމަ ހާފުގެ 21 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކެވިން ޕިނާއެވެ.
މެޗުގައި އުރުގުއޭއިން ނަތީޖާ ހަމަހަމަކުރީ ފުރަތަމަ ހާފުގެ 45 މިނެޓުގެ ކުޅުން ހަމަވާޏް މިނެޓަކަށްވެފައި ވަނިކޮށް، މެކްސިމިލިއާނޯ އަރައުހޯ ކާމިޔާބުކުރި ލަނޑުންނެވެ. އަދި މި ހާފުގެ ފުރިހަމަވަގުތު ހަމަވެ ދެއްކި އިތުރުވަގުތުގެ ހަވަނަ މިނެޓުގައި އެގަސްޓިން ކެނޯބިއޯ ވަނީ މެޗުގައި އުރުގުއޭއަށް ލީޑުނަގައިދީފައެވެ. މެޗުގެ ނަތީޖާ ކޭޕް ވާޑޭއިން ހަމަހަމަކުރީ ދެވަނަ ހާފުގައި، މެޗުގެ 61 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ހީލިއޯ ވަރޭލާއެވެ. މި ނަތީޖާއާއެކު ގްރޫޕް އެޗްގެ އެއްވަނައިގައި 4 ޕޮއިންޓާއެކު ސްޕެއިން އޮތްއިރު، އުރުގުއާއީ އަދި ކޭޕް ވާޑޭއަށްވެސް ލިބިފައިވަނީ 2 ޕޮއިންޓެވެ.
ކިޔުންތެރިންގެ ހިޔާލު