ކ. ގިރިފުށީގައި ދިވެހި އަސްކަރިއްޔާގެ ތަމްރީނުތަކަށް ޚާއްޞަކޮށްގެން ހިންގާ ބިން ހިއްކުމާއި، ބިން ހިމާޔަތްކުރުމުގެ އިތުރުން ބަނދަރު އަޕްގްރޭޑްކުރުމުގެ ބޮޑު މަޝްރޫޢު، ދިފާޢީ އަދި ވަޠަނީ ޚިދުމަތާ ބެހޭ ވަޒީރު އޮނަރަބަލް ޙަސަން ރަޝީދު މިއަދު ރަސްމީކޮށް އިފުތިތާހުކޮށްދެއްވައިފިއެވެ.
މި މަޝްރޫޢަކީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒު، ދިވެހި އަސްކަރިއްޔާގެ ޤާބިލުކަން އިތުރުކުރުމަށްޓަކައި އެކަށައަޅުއްވާފައިވާ އިސްތިރާޖީ ލަނޑުދަނޑިތަކުގެ ދަށުން ފެށިގެންދާ އެންމެ ބޮޑު އެއް މަޝްރޫޢެވެ. މި މަޝްރޫޢުގެ މައިގަނޑު މަޤުޞަދަކީ ޤައުމީ ދިފާޢީ ބާރަށް ބޭނުންވާ ތަމްރީނުގެ ޒަމާނީ ވަސީލަތްތައް ޤާއިމުކޮށް، ސިފައިންގެ ހުނަރާއި ޤާބިލުކަން އިތުރުކޮށްދިނުމެވެ. އަދި މި މަޝްރޫޢު ނިމުމުން ގިރިފުށި ވެގެންދާނީ ދިވެހި ވަޠަނީ ޚިދުމަތުގެ ތަމްރީނުތަކުގެ މައި މަރުކަޒަށް ކަމުގައި ދިފާޢީ ވުޒާރާއިން ފާހަގަކުރެއެވެ.
މި މަޝްރޫޢުގެ ފުރަތަމަ ފިޔަވަހީގެ ދަށުން، މިހާރު ގިރިފުށީގައި އޮތް 5.7 ހެކްޓަރުގެ ބިމުގެ ތެރެއަށް އިތުރު 13.3 ހެކްޓަރުގެ ބިން ހިއްކައިގެން އިތުރުކުރެވޭނެއެވެ. މިއާއެކު އައްސޭރިފަށުގެ ހިމާޔަތަށް ބޮޑުހިލައިގެ ރިވެޓްމަންޓް ޖެހުމާއި، ރަށްގިރުން ހުއްޓުވުމަށް ބޭރުތޮށްޓާއި ގްރޮއިންސް ޤާއިމުކުރުމުގެ މަސައްކަތް ވެސް ކުރިއަށްދާނެއެވެ. މީގެ އިތުރުން އުޅަނދުފަހަރު ކައިރިކުރުމަށް އެލް-ބްލޮކް ކީ-ވޯލްއެއް ހެދުމާއި، 40 މީޓަރު އަދި 12 މީޓަރުގެ ދެ ޖެޓީ ތަރައްޤީކުރުމަށް ވަނީ ހަމަޖެހިފައެވެ. އަދި މިހާރު ބޭނުންކުރަމުންދާ 100 މީޓަރުގެ ފަޔަރިންގ ރޭންޖުގެ ބަދަލުގައި، 300 މީޓަރުގެ ސްމޯލް އާމްސް ރޭންޖެއް މި ރަށުގައި ތަރައްޤީކުރެވިގެންދާނެއެވެ.
މި މަޝްރޫޢުގެ މަސައްކަތްތައް ނިމުމުން، ދިވެހި އަސްކަރިއްޔާގެ އޮފިސަރ ޓްރޭނިންގ ވިންގާއި އެންސީއޯ އެކެޑަމީގެ ތަމްރީނުތަކަށް ބޭނުންވާ ފުރިހަމަ އުމްރާނީ ވަސީލަތްތަކާއި އެކޮމޮޑޭޝަން ފެސިލިޓީތައް ގިރިފުށީގައި ޤާއިމުކުރެވޭނެއެވެ. މި މުހިންމު މަޝްރޫޢު ފެށުމަށް ބޭއްވި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޣިޔާޘް އަދި އެމްއެންޑީއެފް ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީސްގެ ކޮމާންޑަރ ބްރިގޭޑިއަރ ޖެނެރަލް ޑޮކްޓަރ ޙުސައިން އިބްރާހީމް ބައިވެރިވެވަޑައިގެންނެވިއެވެ. މީގެ އިތުރުން ސާޖަންޓް މޭޖަރ އޮފް އެމްއެންޑީއެފް ނަޞްރުﷲ ވަސީމާއި އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީގެ އިތުރުން ދިފާޢީ ވުޒާރާގެ އިސްވެރިން ބައިވެރިވެވަޑައިގެންނެވިއެވެ.
ކިޔުންތެރިންގެ ހިޔާލު