މިއީ ސަޢުދި ޢަރަބިއްޔާއިން ފީފާ ވޯލްޑްކަޕްގައި ވާދަކުރާ ހަތްވަނަ ފަހަރެވެ. އެޤައުމުން އެންމެ ފުރަތަމަ ވޯލްޑް ކަޕްގައި ވާދަކޮށްފައިވަނީ 1994 ވަނަ އަހަރުއެވެ.
އެމެރިކާގައި ބޭއްވި ވޯލްޑްކަޕްގެ ދެވަނަ ބުރުގެ ޖާގައެއް ސަޢުދީން ހޯދި ފަހުން މިހާތަނަށް އެ ޓީމަށް ގްރޫޕް ސްޓޭޖް ފަހަނައަޅާ ދެވިފައެއް ނުވެއެވެ. އެހެންކަމުން މިފަހަރު އެމެރިކާއާއި ކެނެޑާގެ އިތުރުން މެކްސިކޯގައި ބާއްވާ ވޯލްޑްކަޕްގައި ވާދަކުރަނީ އެކަން ބަދަލުކުރުމުގެ އަޒުމުގައެވެ.
2022 ވަނަ އަހަރު ޤަތަރުގައި ބޭއްވި ފީފާ ވޯލްޑް ކަޕުގައި މުބާރާތުގެ ޗެމްޕިއަން އާޖެންޓީނާއަށް، އެ ޓީމުގެ ފުރަތަމަ މެޗުގައި ސަޢުދީ އަރަބިއްޔާއިން ވަނީ އާޖެންޓީނާ ބަލިކޮށްފައެވެ.
މިރޭ އުރުގުއޭއާއި ދެކޮޅަށް ނިކުންނަ ސަޢުދީގެ ޓީމުގައި ހިމެނޭ ކުޅުންތެރިންގެ ތެރެއިން އެންމެ ފާހަގަ ކޮށްލެވެނީ އެ ޓީމުގެ ކެޕްޓަން ސާލެމް އަލް ދޮސާރީއެވެ. އޭގެ އިތުރުން ފްރާންސްގެ ލީގުގައި ކުޅޭ ސައުދު އަބްދުލް ހާމިދުގެ އިތުރުން 23 އަހަރުގެ މުއްސަބު އަލް ޖުވެއިރު ހިމެނެއެވެ.
އަނެއްކޮޅުން މިރޭ ސައުދީއާއި ދެކޮޅަށްކުޅޭ އުރުގުއޭ މިއީ ވޯލްޑްކަޕްގައި ޖެހިޖެހިގެން ކުޅޭ ފަނަރަވަނަ ފަހަރެވެ. މީގެ ކުރިން ދެ ފަހަރު މަތިން ފީފާ ވޯލްޑް ކަޕްގެ ޗެމްޕިއަންކަން އުރުގުއޭ ވަނީ ހޯދާފައެވެ.
ފަހަކަށް އައިސް ހޯދިފައިވާ އެންމެ ރަނގަޅު ކާމިޔާބީ އަކީ 2010 ވަނަ އަހަރުގެ ވޯލްޑްކަޕްގެ ހަތަރުވަނަ މަގާމް ހޯދުމެވެ. 2018 ވަނަ އަހަރުގެ ކުއާޓަރ ފައިނަލަށް ދިޔަ ނަމަވެސް 2022 ވަނަ އަހަރު ގަތަރުގައި ބޭއްވި ވޯލްޑްކަޕްގެ ގްރޫޕް ސްޓޭޖުން އުރުގުއޭ ވަނީ ކަޓާފައެވެ.
އުރުގުއޭ އިން އެންމެ ފަހުން ކުޅުނު ފަސް މެޗަށް ބަލާއިރު އެ ޓީމު މޮޅުވެފައިވަނީ މިދިޔަ އަހަރުގެ އޮކްޓޯބަރ މަހު އުޒްބެކިސްތާނާ ދެކޮޅަށް ކުޅުނު މެޗުންނެވެ. އޭގެ ފަހުން މެކްސިކޯ އާއި ދެކޮޅަށް ކުޅުނު މެޗާއި އިންގްލެންޑްގެ އިތުރުން އަލްޖީރިޔާއާ ދެކޮޅަށް ކުޅުނު މެޗުތައް ވަނީ އެއްވަރުވެފަ އެވެ. ނަމަވެސް އެމެރިކާ އަތުން 5-1 ގެ ނަތީޖާއަކުން ވަނީ މިދިޔަ އަހަރުގެ ނޮވެމްބަރ މަހު ބަލިވެފައެވެ.
އުރުގުއޭ ޓީމުގައި ފާހަގަކޮށްލެވޭ ކުޅުންތެރިންގެ ތެރޭގައި ހިމެނެނީ ރެއާލް މެޑްރިޑާއެކު ކުލަބު ފެންވަރުގެ އެތައް ކާމިޔާބީއެއް ހޯދާފައިވާ ވަލްވާޑޭއާއި ސަޢުދީގެ އަލް ހިލާލަށް ކުޅެމުންދާ ޑާވިން ނޫނޭޒް, މެންޗެސްޓަރ ސިޓީގެ މެނުއެލް އުގާޓޭ, ބާސެލޯނާގެ ރޮނަލްޑް އަރައުހޯއާއި މެންޗެސްޓަރ ޔުނައިޓެޑްގ މެނުއެލް އުގާޓޭއެވެ.
އުރުގުއޭއާއި ސައުދި ވާދަކުރާ މެޗު އޮންނަނީ ރާއްޖެ ގަޑިން މިރޭ 03:00ގައެވެ.
ކިޔުންތެރިންގެ ހިޔާލު