ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ވެލްނަސް ސެންޓަރު ކުއްޔަށް ހިފައިގެން ހިންގައިދޭނެ ފަރާތެއް ހޯދުމަށް އިއުލާން ކޮށްފިއެވެ.
މި ސެންޓަރަކީ ދަރިވަރުންނާއި މުވައްޒަފުންގެ އިތުރުން އާންމުންނަށް ބޭނުންވާ ނަފްސާނީ ދުޅަހެޔޮކަމާއި ކައުންސެލިންގ އަދި ނަފްސާނީ އިޖުތިމާޢީ އެހީތެރިކަން ފޯރުކޮށްދިނުމަށް ޤާއިމުކޮށްފައިވާ މަރުކަޒެކެވެ. މީގެ އިތުރުން، މިއީ ދަރިވަރުންނަށް ބޭނުންވާ ޢަމަލީ ތަމްރީނާއި އިންޓާންޝިޕްގެ ފުރުޞަތުތައް ފަހިކޮށްދޭ ތަނެއްވެސް މެއެވެ.
އެމްއެންޔޫއިން ބުނިގޮތުގައި، ސެންޓަރު ހިންގާ ފަރާތުން ދޭ ޚިދުމަތްތަކަކީ ދަރިވަރުންނާއި މުވައްޒަފުންނަށް ފަސޭހައިން ލިބޭނެ އަގުހެޔޮ އަދި ފެންވަރު ރަނގަޅު ޚިދުމަތްތަކަކަށް ވާންޖެހޭނެއެވެ.
ސެންޓަރުން ދޭނެ މައިގަނޑު ޚިދުމަތްތައް:
-
ވަކިވަކި ފަރުދުންނަށާއި ގްރޫޕްތަކަށް ދޭ ކައުންސެލިންގ، ސައިކޯތެރަޕީ އަދި ނަފްސާނީ އެސެސްމަންޓްތައް ހެދުން.
-
އާއިލާތަކަށާއި ޒުވާނުންނަށް ޚާއްސަ ކައުންސެލިންގ ދިނުން.
-
ނަފްސާނީ ދުޅަހެޔޮކަމަށް ހޭލުންތެރިކުރުމާއި، ސްޓްރެސް މެނޭޖްމަންޓް ޕްރޮގްރާމްތަކާއި ވޯކްޝޮޕްތައް ހިންގުން.
މި ސެންޓަރު ހިންގާ ފަރާތުން ކޮންމެ ސެމެސްޓަރެއްގައި މަދުވެގެން 10 ދަރިވަރުންނަށް އަމަލީ ތަމްރީނުގެ ފުރުސަތު ދޭންޖެހެއެވެ. އަދި ސެންޓަރަށް މުވައްޒަފުން ނަގާއިރު، ޝަރުތު ހަމަވާ އެމްއެންޔޫގެ ދަރިވަރުންނާއި ދަސްވެނިންނަށް އިސްކަންދޭންޖެހޭނެ ކަމަށްވެސް އިއުލާނުގައިވެއެވެ.
މުހިންމު ތާރީޚުތައް:
-
ޕްރީ ބިޑް މީޓިންގ: 14 ޖޫން 2026 ވާ އާދިއްތަ ދުވަހުގެ 10:00 ގައި، އެމްއެންޔޫގެ ފެކަލްޓީ އޮފް ހެލްތް ސައިންސަސްގައެވެ.
-
ބީލަން ހުށަހެޅުން: 29 ޖޫން 2026 ވާ ހޯމަ ދުވަހުގެ 10:00 ގައި، އެމްއެންޔޫގެ އިދާރީ މަރުކަޒުގައެވެ.
ކިޔުންތެރިންގެ ހިޔާލު