އީރާނުން އިސްރާއީލަށް ދިން ހަމަލާތަކުން ޒަޔަނިސްޓުންނާއި، ޒަޔަނިސްޓުންގެ ސަޕޯޓަރުން ފިލާވަޅު ލިބިގަންނަން ޖެހޭ ކަމަށް އީރާނު އަސްކަރިއްޔާއިން ބުނެފިއެވެ.
އީރާނު އަސްކަރިއްޔާއިން މިހެން ބުނެފައިވަނީ، އިސްތިއުމާރީ އިސްރާއީލަށް ދޭންފެށި ހަމަލާތައް ހުއްޓާލިކަން އިއުލާން ކުރަމުންނެވެ.
އީރާނު އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އީރާނުން އިސްރާއީލަށް ދިން ހަމަލާތަކަކީ ރައްދު ހަމަލާތަކެއް ކަމަށާއި، އެއީ ޒަޔަނިސްޓުންނާއި އެމީހުންގެ ބައިވެރިން ފިލާވަޅު ލިބިގަންނަންޖެހޭ ކަމެއް ކަމަށެވެ.
ހަމަ އެއާއެކު އީރާނު އަސްކަރިއްޔާއިން ފެށި އޮޕަރޭޝަން، ރޭވިފައިވާގޮތަށް މިވަގުތަށް ހުޓާލިކަން އިއުލާންކުރާ ކަމަށް ބުނެފައި ވެއެވެ.
އެހެން ނަމަވެސް، ލުބުނާނުގެ ދެކުނަށް އަލުން ހަލާތައްދީ އުދުވާނު ފަށައިފިނަމަ ކުރިއަށްވުރެ މާ ހަރުކަށި އަދި ދުޝްމަނުން ފުނޑުފުނޑުކޮށްލާފަދަ ހަމަލާތަކެއް އީރާނުން ދޭނޭ ކަމަށް، އަސްކަރިއްޔާގެ ބަޔާނުގައި އިންޒާރު ކޮށްފައި ވެއެވެ.
އީރާނާއި އިސްރާއީލާ ދެމެދު ރޭ ފަތިހުން ފެށިގެންވަނީ ވަރުގަދަ ހަމަލާތަކެއް ބަދަލުކޮށްފައެވެ.
އީރާނުން އިސްރާއީލުގެ އުތުރުގައި ހުންނަ އިސްތިއުމާރީ ސިފައިންގެ ބޭސްތަކަށް މިސައިލް ހަމަލާތައް ދިނުމުން އިސްތިއުމާރީ ސިފައިންވަނީ އީރާނުގެ ވެރިރަށް ތެހެރާނާއި، ތަބްރީޒާއި، ކަރާޖާއި، އިސްފަހާނަށް ބޮންއަޅާފައެވެ.
އީރާނުންވެސް ފަހުންވަނީ އިސްތިއުމާރީ އިސްރާއީލުގެ އެތައް ތަނަކަށް ވަރުގަދަ މިސައިލް ހަމަލާތަކެއް ދީފައެވެ.
އީރާނުން އިސްރާއީލަށް މިސައިލް ހަމަލާތައް ދޭންފެށީ، ހަމަލާތައް ހުއްޓާލުމަށް އީރާނާއި އެމެރިކާއާ ދެމެދު ވެފައިވާ އެއްބަސްވުމާ ޚިލާފްވެ އިސްތިއުމާރީ ސިފައިން ލުބުނާނަށް ބޮންއަޅަމުންދިއުމާއި، ވެރިރަށް ބެއިރޫތަށްވެސް ހަމަލާދިނުމާ ގުޅިގެން އެކަމުގެ ރައްދުގައެވެ.
އިސްތިއުމާރީ ދައުލަތުގެ އޮފިޝަލުން މިހާރު ބުނަމުންދަނީ އިސްރާއީލުންވެސް އީރާނަށް ހަމަލާދިނުން މިހާރު ހުއްޓާލާފައިވާ ކަމަށާއި، ހަމަލާތައް ހުއްޓާލީ އެމެރިކާގެ ރައީސް ޓްރަމްޕް އެދިގެން ކަމަށެވެ.
އަދި ހިޒްބުﷲއިން އިސްރާއީލުގެ އަވަށްތަކަށް ހަމަލާ ދީފިނަމަ އިސްރާއީލުން ބެއިރޫތަށް ހަމަލާ ދޭނޭ ކަމަށްވެސް އިންޒާރު ކޮށްފައި ވެއެވެ.
ކިޔުންތެރިންގެ ހިޔާލު