ނައިބު ރައީސް ހުސައިން މުހައްމަދު ލަތީފް މަގާމުން ވަކިކުރަން އުޅޭ ކަމަށް ބުނެ އިދިކޮޅު ފަރާތްތަކުން ފަތުރަމުންދާ ވާހަކަތަކަކީ އެއްވެސް އަސާސެއް ނެތް “ބުހުތާނު ދޮގު” ތަކެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
“ސިޔާސީ ގޮތުން ޑެސްޕަރޭޓްވެގެން ފަތުރާ ގޮސިޕް”
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް ވިދާޅުވީ، ނައިބު ރައީސް ވަކިކުރާ ވާހަކައަކީ ހަމައެކަނި “ގޮސިޕް” އެއް ކަމަށާއި، މިއީ ސިޔާސީ ގޮތުން މީހުން މާ ބޮޑަށް “ޑެސްޕަރޭޓް” ވެގެން ކުރާ ކަންކަން ކަމަށެވެ. އަދި އެއްވެސް ލަދުވެތިކަމެއް ނެތި މިފަދަ ހަގީގަތާ ހިލާފު ވާހަކަތައް ފަތުރަމުންދިއުމަކީ ރާއްޖޭގެ ސިޔާސީ މައިދާން ގޮސްފައިވާ ދަށު ދަރަޖަ ހާމަކޮށްދޭ ކަމެއް ކަމަށް އެމަނިކުފާނު ސިފަކުރެއްވިއެވެ.
“އެހެންވީމާ ދޮގުގެ ވެސް، ބުހުތާނު ދޮގަށް ވުރެ ވެސް އެހެން ލެވެލް އެއް، އެހެން ނަމެއް ކިޔަން ޖެހިއްޖެ މިއަށް. ބުހުތާނު ދޮގު، އަޅުގަނޑު ހީކުރަނީ އެންމެ މައްޗަށް ހުންނަނީ. އެއަށް ވުރެ ވެސް މައްޗަށް މި ދިޔައީ،” – ރައީސް މުއިއްޒު
Advertisement
ރާއްޖޭގައި މިވަގުތު ޒިންމާދާރު އިދިކޮޅު ފަރާތްތަކެއް ނެތްކަން ފާހަގަކުރައްވައި، ގައުމުގެ މަތީ މަގާމުތައް އަދާކޮށްފައި ތިއްބެވި ބޭފުޅުން މިފަދަ ދޮގު ވާހަކަތައް ދައްކަވާތީ ހިތާމަކުރައްވާ ކަމަށް ރައީސް ވިދާޅުވިއެވެ.
މަޖިލީހުގެ ނައިބު ރައީސްކަމުން ނާޒިމް ވަކިކުރަން ނިންމުމާ ގުޅިގެން ސިންގަޕޫރުގައި އޭނާއާ ބައްދަލުކުރެއްވި ކަމަށް ބުނެ ދެކެވޭ ވާހަކަތައްވެސް ރައީސް ވަނީ ދޮގު ކުރައްވައިފައެވެ. ރައީސް ވިދާޅުވީ ސިންގަޕޫރަށް ކުރެއްވި ދަތުރުފުޅަކީ އާއިލާއާ އެކު ޗުއްޓީ ހޭދަކުރެއްވުމަށް މާ ކުރިއްސުރެ ރާއްވަވާފައި އޮތް ދަތުރެއް ކަމަށާއި، އެ ދަތުރުފުޅުގައި އެއްވެސް ސިޔާސީ މަޝްވަރާއެއް ނުވަތަ ބައްދަލުވުމެއް ބާއްވާފައި ނުވާނެ ކަމަށެވެ.
މި ދަތުރުފުޅަކީ އާއިލީ ދަތުރެއްކަން ސިންގަޕޫރުގައި ހުންނަވާ ރާއްޖޭގެ ސަފީރާއި ހައިކޮޝަނުގެ މުވައްޒަފުންނަށް އެނގިވަޑައިގަންނަވާނެ ކަމަށް ވިދާޅުވެ، ރައީސް ވަނީ އެފަދަ ދަށު ދަރަޖައިގެ އަމަލުތައް ހުއްޓާލުމަށް އިދިކޮޅު ފަރާތްތަކަށް ގޮވާލައްވާފައެވެ.
ކިޔުންތެރިންގެ ހިޔާލު