ވ. އަލިމަތާ ކައިރީގައި އޮންނަ ކަނޑު އަޑީގެ ހޮހޮޅައަކަށް ފީނުމުގެ ތެރޭގައި މަރުވި އިޓަލީގެ ފަސް ޑައިވަރުން އެ ނުރައްކާތެރި ތަނަށް ވަދެފައިވަނީ ރައްކާތެރިކަމުގެ ގޮތުން ބޭނުންކުރަންޖެހޭ އެންމެ އެކަށީގެންވާ އާލާތްތަކާ ނުލައިކަމަށް، އެ މީހުންގެ ހަށިތައް ނެގުމުގައި ހަރަކާތްތެރިވި ޑައިވަރަކު ހާމަކޮށްފިއެވެ.
ފިންލޭންޑަށް ނިސްބަތްވާ އަދި ޑޭން ޔޫރަޕްގެ ޑައިވަރެއް ކަމަށްވާ ސާމީ ޕަކަރިނެން، އިޓަލީގެ ނޫހެއް ކަމަށްވާ ލަ ރިޕަބްލިކާއަށް ދިން އިންޓަވިއުއެއްގައި ބުނެފައިވަނީ މަރުވި ޑައިވަރުންގެ އަތުގައި ގައިޑް ރޯޕް ވެސް ނެތް ކަމަށެވެ. އާންމުކޮށް އެފަދަ ހަނި އަދި ފުން ހޮހޮޅަތަކަށް ވަންނައިރު މަގު ދައްކައިދިނުމަށް ބޭނުންކުރާ ގައިޑް ރޯޕް ނުވަތަ ޑައިވިން ރީލް ފަދަ ތަކެތި ބޭނުން ނުކޮށް، އެފަދަ ނުރައްކާތެރި ތަނަކަށް އެ މީހުން ވަނީ ކީއްވެގެންތޯ އޭނާ ވަނީ ސުވާލު އުފައްދާފައެވެ.
ޕަކަރިނެން މައުލޫމާތު ދިން ގޮތުގައި، އެ ފަސް ޑައިވަރުންގެ ހަށިތައް ފެނިފައިވަނީ ހޮހޮޅައިގެ އެއް ދިމާލަކުންނެވެ. އެއީ ވަރަށް ފުން ހިސާބެއްކަން ފާހަގަކުރަމުން އޭނާ ބުނީ، މިއީ އިންސާނުންނަށް ހެދޭ ގޯހަކުން، ނުވަތަ ހިއުމަން އެރާއަކުން ހިނގާފައިވާ ހިތާމަވެރި ހާދިސާއެއްކަމަށް ބޮޑަށް ގަބޫލުކުރެވޭ ކަމަށެވެ. ނަމަވެސް މި ހާދިސާގައި އަސްލު ކަން ހިނގައިދިޔަ ގޮތް ނިންމާނީ ކަމާބެހޭ ތަހުގީގު ޓީމުންކަމަށް އޭނާ ބުންޏެވެ.
ހޮހޮޅަތަކަށް ފީނާ މީހުންނަށް ގައިޑް ރޯޕެއް ނެތި އެފަދަ ތަންތަނަށް ވަނުމަކީ ބުއްދިވެރި ކަމެއް ނޫންކަން އެނގޭނެކަމަށް ޕަކަރިނެން ފާހަގަކުރިއެވެ. އަދި ހިތާމައަކީ އެފަދަ ހޮހޮޅަތަކުގައި ހިނގާ ގިނަ ހާދިސާތަކުގެ އަސްލަކީ އަމިއްލައަށް ހެދޭ ގޯސްތައް ކަމަށްވުން ކަމުގައި އޭނާ އިތުރަށް ބުނެފައިވެއެވެ.
ކިޔުންތެރިންގެ ހިޔާލު