އެމެރިކާގެ ވައިޓް ހައުސްގެ ބޭރުގައި ބަޑިޖެހުމުގެ ހާދިސާއެއް ހިނގައިގެން އެމެރިކާގެ ސީކްރެޓް ސަރވިސް އޭޖެންޓުން ހަރަކާތްތެރިވަމުން އެބަދެއެވެ.
ބަޑިޖަހާފައިވަނީ ވައިޓް ހައުސްގެ ނޯތު ލޯންއާ ދިމާއަށެވެ.
ބަޑިޖެހުމުގެ ހާދިސާ ހިނގި ވަގުތު އެމެރިކާގެ ރައީސް ޑޮނަލްޑް ޓްރަމްޕްވެސް ހުރީ ވައިޓް ހައުސްގެ ތެރޭގައެވެ.
މިހާދިސާގައި އެމެރިކާގެ ރައީސަށް ކަމެއް ވީކަމެއް އަދި ސާފެއް ނުވެއެވެ. ނަމަވެސް ވައިޓް ހައުސްގެ އުތުރު ހުޅަނގު ކަނުގައި ދެމީހަކަށް ފަރުވާދެމުންދާ ކަމަށް ނޫސްވެރިން ބުނެއެވެ.
ވައިޓް ހައުސް ކައިރީގައި ޖަމާވެފައި ތިބި ނޫސްވެރިން ބުނެފައިވަނީ ގާތްގަނޑަކަށް ތިރީހަކަށް ވަޒަން ފޮނުވާލި އަޑު އިވުނު ކަމަށެވެ. ބަޑިޖެހީ ދެމީހަކު ވެގެން ކަމަށްވެސް ބައެއް ރިޕޯޓްތައް ބުނެއެވެ.
ބަޑިޖަހަން ފެށުމުން ނޫސްވެރިން ރައްކާތެރިވާން ސީކްރެޓް ސަރވިސް އޭޖެންޓުން ގޮވައި ހަޅޭލަވާ އަޑާއި، ނޫސްވެރިން ސަލާމަތް ހޯދަން މަސައްކަތް ކުރާ މަންޒަރު ލައިވްކޮށް ޓީވީތަކުން ފެނިފައި ވެއެވެ. ނޫސްވެރިން ސަލާމަތްކުރަން ވައްދާފައިވަނީ ޕްރެސް ރޫމަށް ކަމަށް ވެއެވެ.
ބަޑިޖެހުމުގެ ހާދިސާއާއެކު ސީކްރެޓް ސާރވިސް އޭޖެންޓުންނާއި، ފެޑެރަލް އޭޖެންޓުންވަނީ ވައިޓް ހައުސް ވަށާލާފައެވެ. އަދި އިމަޖެންސީ އަސްކަރީ ވެހިކަލްތަކާއެކު ވައިޓް ހައުސް މިހާރުވަނީ ލޮކްޑައުން ކޮށްފައެވެ.
ވައިޓް ހައުސް ކައިރީގައި ބަޑިޖެހުމުގެ ހާދިސާއެއް މި ހިނގީ، އީރާނު ހަނގުރާމަ ހުއްޓާލުމާ ގުޅޭގޮތުން އެމެރިކާއާއި އީރާނާ ދެމެދު ހެދުނު އެއްބަސްވުމާ ގުޅޭގޮތުން ޕްރެސް ކޮންފަރެންސެއް ބޭއްވުމަށް އެމެރިކާގެ ރައީސް ތައްޔާރުވަމުން ދަނިކޮށެވެ.
ބަޑިޖެހުމުގެ ހާދިސާ ގުޅިގެން އެމެރިކާ ސަރުކާރުން އަދި އެއްވެސް އެއްޗެއް ނުބުނެއެވެ. ޒަޚަމްވި މީހުންނާ ބެހޭ މައުލޫމާތެއް އަދި ބަޑިޖެހީ ކޮން ބައެއް ކަމެއްވެސް އަދި ސާފެއް ނުވެއެވެ.
ކިޔުންތެރިންގެ ހިޔާލު