މައްކާގައި ހުންނަ މާތްވެގެންވާ މަސްޖިދުލް ހަރަމްގައި މިއަދު ކުރެވުނު ހުކުރު ނަމާދުގައި އެތައްހާސް މުސްލިމުން ބައިވެރިވިއެވެ. މީގެތެރޭގައި ގިނައީ މިއަހަރުގެ ހައްޖުގެ އަޅުކަމަށް މައްކާއަށް ގޮސްފައިވާ އެހެން ގައުމުތަކުގެ މުސްލިމުންނެވެ.
މިއަހަރުގެ ހައްޖުގެ އަޅުކަން ފުރިހަމަކުރުން ކުރިއަށް އޮތްއިރު، ހައްޖުގެ އަޅުކަމަށް ދުނިޔޭގެ އެކި ކަންކޮޅުތަކުން ދެމިލިއަނާ ގާތްކުރާ އަދަދަކަށް މުސްލިމުން މައްކާއަށް ޖަމާވެފައި ވެއެވެ. ހައްޖުގެ އަޅުކަމަށް އަދިވެސް މުސްލިމުން މައްކާއަށް ޖަމާވަމުން އެބަދެއެވެ.
ހައްޖުވެރިންނަށް އޯގާތެރިކަމާއި، ސަލާމަތްތެރިކަމާއި އަދި ދަތިކަމެއްނެތި ހައްޖުގެ އަޅުކަމުގެ ކަންކަން ފުރިހަމަކޮށްދިނުމުގައި އެހީތެރިވުމަށް ސައުދީ އަރަބިއްޔާވަނީ ވަރަށް ބޮޑަށް ތައްޔާރުވެފައެވެ.
ހައްޖުވެރިންނަށް ޚިދުމަތް ދިނުމަށް އެތައްހާސް މެމްބަރުން ހިމެނޭ ސަލާމަތީ ފައުޖުތަކުން ވެފައިވާ ތައްޔާރީތަކާއި، ޕްލޭންތައް ދައްކާލުމަށް ޚާއްސަ އަސްކަރީ ޕެރޭޑެއްވެސް މައްކާގައިވަނީ ބާއްވާފައެވެ. މި ޕެރޭޑްގައި ސަލާމަތީ ކަންކަން ބަލަހައްޓާ ފައުޖާއި، އަސްކަރީ ވެހިކަލްތަކާއި، ޚާއްސަ ފައުޖުގެ ޔުނިޓްތަކާއި، އިމަޖެންސީ ރެސްޕޮންސް ޓީމުތަކާއި، ވައިގެ ސާވެއިލެންސް އޮޕަރޭޝަނަށް ވެފައިވާ ތައްޔާރީތައްވެސް ދައްކާފައި ވެއެވެ.
މި ޕެރޭޑް އިންސްޕެކްޓް ކޮށްދެއްވީ ސައުދީ ސަރުކާރުގެ ދާޚިލީ ވަޒީރު އަދި ސުޕްރީމް ހައްޖު ކޮމިޓީގެ ޗެއަރމަން ޕްރިންސް އަބްދުލް އަޒީޒް ބިން ސުއޫދުއެވެ.
ކިޔުންތެރިންގެ ހިޔާލު