ސިޓީތަކާއި ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސުންގެ މުސާރަ ބޮޑުކުރުމަށް ނޭޝަނަލް ޕޭ ކޮމިޝަނުން ނިންމައިފިއެވެ.
ސިޓީތަކުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސުންނަށް މިހާރު މަހަކު 7،000 ރުފިޔާގެ މުސާރައެއް ލިބެއެވެ. އަދި ނައިބު ރައީސުންނަށް 6،500 ރުފިޔާ ލިބޭއިރު، ކޮމިޓީގެ މެންބަރުންނަށް ލިބެނީ 6،000 ރުފިޔާއެވެ.
ރަށްރަށުގެ ކޮމިޓީތަކުގެ ރައީސުންނަށް މަހަކު 6،000 ރުފިޔާގެ މުސާރައެއް ލިބޭއިރު، ނައިބު ރައީސުންނަށް 5،500 ރުފިޔާ އަދި މެންބަރުންނަށް 5،000 ރުފިޔާ ލިބެއެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުން ފުލްޓައިމްކޮށް މަސައްކަތްކުރަން ޖެހޭނެ ކަމަށް ނިންމުމާ ގުޅިގެން، ނޭޝަނަލް ޕޭ ކޮމިޝަނުން ވަނީ މުސާރަތައް މުރާޖައާކޮށްފަ އެވެ. އެގޮތުން، ސިޓީތަކުގެ ކޮމިޓީ ރައީސުންގެ މުސާރައަކީ މަހަކު 41،500 ރުފިޔާ ކަމަށާއި، ރަށްރަށުގެ ކޮމިޓީ ރައީސުންގެ މުސާރައަކީ މަހަކު 21،000 ރުފިޔާ ކަމަށް ވަނީ ކަނޑައަޅައިފައެވެ.
ސިޓީތަކުގެ ރައީސުންގެ މުސާރަ ބެހިފައިވާ ގޮތަކީ 33،000 ރުފިޔާގެ މުސާރައަކާއި 8،500 ރުފިޔާގެ ލިވިން އެލަވަންސެކެވެ. ރަށްރަށުގެ ރައީސުންގެ މުސާރަ ބެހިފައިވަނީ 16،500 ރުފިޔާގެ މުސާރައަކާއި 4،500 ރުފިޔާގެ ލިވިން އެލަވަންސެއްގެ ގޮތުގައެވެ.
މި ބަދަލުތަކާ ގުޅިގެން ސިޓީތަކާއި ރަށްރަށުގެ ކޮމިޓީތަކުގެ ނައިބު ރައީސުންނާއި މެންބަރުންގެ މުސާރައަށް ވެސް ބަދަލުތަކެއް އައިސްފައިވެ އެވެ. ސިޓީތަކުގެ ނައިބު ރައީސުންގެ މުސާރަ 7،000 ރުފިޔާއަށް ބޮޑުކޮށްފައިވާއިރު، ބައްދަލުވުމަކަށް ހާޒިރުވާ ކޮންމެ ފަހަރަކު 500 ރުފިޔާގެ އެލަވަންސެއް ލިބޭނެ އެވެ.
ރަށްރަށުގެ ނައިބު ރައީސުންގެ މުސާރަ 6،000 ރުފިޔާއަށް ބޮޑުކޮށްފައިވާއިރު، ބައްދަލުވުންތަކަށް 500 ރުފިޔާގެ އެލަވަންސެއް ދިނުމަށް ވަނީ ނިންމައިފަ އެވެ. ކޮމިޓީ މެންބަރުންގެ އަސާސީ މުސާރައަށް ބަދަލެއް ނައި ނަމަވެސް، ބައްދަލުވުންތަކަށް ހާޒިރުވާ ކޮންމެ ފަހަރަކު 500 ރުފިޔާގެ އެލަވަންސެއް ލިބޭނެ ކަމަށް ނޭޝަނަލް ޕޭ ކޮމިޝަނުން ވަނީ ނިންމައިފަ އެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް އަލަށް އިންތިޚާބުވި ރައީސުންނަށް މުސާރައިގެ މި ބަދަލުތައް ވަނީ އަންގާފައެވެ.
ކިޔުންތެރިންގެ ހިޔާލު