ދިވެހިރާއްޖެއިން އެކްސްޕޯޓުކުރާ މަހުގެ ބާވަތްތަކުން ޓެރިފް ނެގުން އިނގިރޭސިވިލާތުން ނިމުމަކަށް ގެނައުމާ ގުޅިގެން، ރާއްޖޭގެ މަސްވެރިކަމުގެ ސިނާއަތަށް އިގުތިސާދީ ބޮޑު ކުރިއެރުމެއް ލިބިފައިވާ ކަމަށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ހާމަކޮށްފިއެވެ.
އިނގިރޭސިވިލާތުގެ ނިންމުމާއި މަސްވެރިކަމުގެ ކުރިއެރުންމިމަހުގެ 20 ވަނަ ދުވަހުން ފެށިގެން އަމަލުކުރަން ފެށި މި ބަދަލަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިނގިރޭސިވިލާތަށް ކުރެއްވި ރަސްމީ ދަތުރުފުޅުގައި، އެ ގައުމުގެ ރަސްގެފާނާއި ސަރުކާރުގެ އިސްވެރިންނާއެކު ބޭއްވެވި މަޝްވަރާތަކުގެ ނަތީޖާއެކެވެ.
ދިވެހި މަހަށް ޓެރިފް ކަނޑާލުމަކީ އިނގިރޭސިވިލާތުގައި ބޭއްވެވި މަޝްވަރާތަކުގައި ރައީސް އެންމެ އިސްކަމެއް ދެއްވައިގެން ކުރެއްވި މަސައްކަތްޕުޅެއް ކަމަށް ޕީއެންސީން ފާހަގަކުރެއެވެ. މި ބަދަލާއެކު ދިވެހި މަހުގެ އެކްސްޕޯޓު އިތުރުވެ، މަސްވެރިކަމުގެ އުފެއްދުންތެރިކަން އިތުރުވެ، ދައުލަތަށް ލިބޭ އާމްދަނީ ބޮޑުތަނުން އިތުރުވާނެ ކަމަށް ބެލެވެއެވެ.
މަސްވެރިކަމުގެ ސިނާއަތް ވެއްޓިފައިވާ އަޑިގަނޑުން ނެގުމަކީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ދުވަހުން ފެށިގެން އެންމެ އިސްކަމެއް ދެއްވާ އެއް މަސައްކަތްޕުޅުކަމަށް ޕީއެންސީގެ ބަޔާނުގައިވެއެވެ. މަސްވެރިން ބާނާ މަހަށް ހަމަ އަގު ހޯދައިދިނުމަށާއި، ބައިނަލްއަގުވާމީ ބާޒާރުތަކުގައި ދިވެހި މަހަށް ފުރުސަތު ހޯދުމަށް ރައީސް ކުރައްވަމުން ގެންދަވާ މަސައްކަތްޕުޅުތައް އެ ޕާޓީން ފާހަގަކުރިއެވެ.
ސަރުކާރުން ގެނައި އިސްލާހުތަކުގެ ތެރޭގައި، ސަރުކާރުގެ ކުންފުނިތަކަށް ކިރުވާ މަހަށް 48 ގަޑިއިރުގެ ތެރޭގައި ފައިސާ ދިނުމުގެ ނިޒާމެއް ގާއިމުކުރުމަކީ މަސްވެރިންނަށް ލިބުނު ބޮޑު ލުޔެއް ކަމަށް ޕީއެންސީން ބުންޏެވެ. މީގެ އިތުރުން، މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމާއި، އައިސް އަޅާ ނިޒާމު ގާއިމުކުރުމަށް މާލީ އެހީތެރިކަން ފޯރުކޮށްދިނުމަކީ ވެސް މި ސަރުކާރުގެ ކާމިޔާބީތަކެއް ކަމުގައި އެ ޕާޓީން ފާހަގަކުރިއެވެ.
މަސްވެރިކަމުގެ ދާއިރާ ތަރައްގީ ކުރުމަށް ފުޅާ ދާއިރާއެއްގައި މަޝްރޫއުތައް ފަށާފައިވާއިރު، ދުނިޔޭގެ ބާޒާރުގައި ދިވެހި މަސް އިޝްތިހާރުކޮށް ވިއްކުމަށް ހާއްސަ ކުންފުންޏެއް އުފައްދާފައިވާކަން ޕީއެންސީގެ ބަޔާނުގައި ވަނީ ފާހަގަކޮށްފައެވެ.
ކިޔުންތެރިންގެ ހިޔާލު