ވޯލްޑް ޓްރެވަލް އެވޯޑްސް (ޑަބްލިއުޓީއޭ) ގެ ފަތުރުވެރިކަމުގެ އެވޯޑު ދިނުމުގެ ޚާއްސަ ރަސްމިއްޔާތު މިއަހަރުގެ ސެޕްޓެމްބަރު މަހުގެ 27 ވަނަ ދުވަހު ރާއްޖޭގައި ބޭއްވުމަށް ނިންމައިފިއެވެ.
ދުނިޔޭގެ ފަތުރުވެރިކަމުގެ ދުވަހާ ދިމާކޮށް ބާއްވާ މި އިވެންޓަކީ އޭޝިއާ، އޯޝަނިއާ އަދި އިންޑިއަން އޯޝަން ސަރަހައްދުގެ ފަތުރުވެރިކަމުގެ ދާއިރާގެ އެންމެ މަތީ ފަންތީގެ ވެރިން އެއްތަންވާ ބޮޑު އިވެންޓެކެވެ.
ކްރޮސްރޯޑްސް މޯލްޑިވްސްގައި ބާއްވާ ހަފުލާމި ރަސްމިއްޔާތު ބޭއްވުމަށް ހަމަޖެހިފައިވަނީ ރާއްޖޭގެ ފުރަތަމަ އިންޓަގްރޭޓެޑް ލައިފްސްޓައިލް ޑެސްޓިނޭޝަން ކަމަށްވާ ކްރޮސްރޯޑްސް މޯލްޑިވްސްގައެވެ. ވެލާނާ އިންޓަނޭޝަނަލް އެއާޕޯޓުން ފެރީއެއްގައި 15 މިނިޓުން ދެވޭ މި މަންޒިލަކީ ތިން ރިސޯޓެއް އެކުލެވޭ ގޮތަށް ތަރައްގީކޮށްފައިވާ ތަނެކެވެ. ޑަބްލިއުޓީއޭގެ ފައުންޑަރ ގްރޭހަމް ކުކް ވިދާޅުވި ގޮތުގައި، ކްރޮސްރޯޑްސް މޯލްޑިވްސްއަކީ ފަތުރުވެރިކަމުގެ މުސްތަގުބަލު ބައްޓަންކުރުމުގައި އާ އީޖާދުތަކާއި އުންމީދުތައް ދައްކުވައިދޭ މަންޒިލެކެވެ.
ސަރަހައްދީ ފަތުރުވެރިކަމުގެ ޝަރަފުމި ރަސްމިއްޔާތަކީ އިންޑިއަން އޯޝަން ލެގްގެ ދަށުން ބާއްވާ ޚާއްސަ އިވެންޓެކެވެ. ޑަބްލިއުޓީއޭއިން ބުނާ ގޮތުގައި މި ނިންމުމަކީ ދިވެހިރާއްޖޭގެ ފަތުރުވެރިކަމުގެ ދާއިރާގެ ވަރުގަދަކަމާއި، ލަގްޒަރީ އަދި ދެމެހެއްޓެނިވި ފަތުރުވެރިކަމުގައި ރާއްޖެއިން ހޯދާފައިވާ ކާމިޔާބީތަކުގެ ހެއްކެކެވެ. މި ހަފުލާގައި އޭޝިއާ، ޕެސިފިކް އަދި އޮސްޓްރޭލިއާގެ ފަތުރުވެރިކަމުގެ ދާއިރާގެ އެންމެ މަތީ ފަރާތްތައް ބައިވެރިވެ، އެ ސަރަހައްދުތަކުގެ ކާމިޔާބީތައް ފާހަގަކުރާނެއެވެ.
ވިޒިޓް މޯލްޑިވްސް ގެ މެނޭޖިން ޑިރެކްޓަރ އިބްރާހިމް ޝިއުރީ ވިދާޅުވީ، މިފަދަ ޝަރަފުވެރި އެވޯޑެއް އަލުން ރާއްޖޭގައި ބޭއްވުމަކީ ލިބޭ ބޮޑު ފަހުރެއް ކަމަށެވެ. އެންމެ ފަހުން 2017 ވަނަ އަހަރު ރާއްޖޭގައި ބޭއްވި މި އެވޯޑު، އަލުން ބޭއްވުމަކީ ދިވެހިރާއްޖެއަކީ ދުނިޔޭގެ އެންމެ ކުރީގެ ފަތުރުވެރި މަންޒިލްކަން ދައްކުވައިދޭ ކަމެކެވެ. މި އިވެންޓުގެ ސަބަބުން ރާއްޖޭގެ ގުދުރަތީ ރީތިކަމާއި މެހެމާންދާރީގެ އިތުރުން، ދެމެހެއްޓެނިވި ފަތުރުވެރިކަމަށް ރާއްޖެއިން ދޭ އަހަންމިއްޔަތު މުޅި ދުނިޔެއަށް ހާމަވެގެންދާނެއެވެ.
ކިޔުންތެރިންގެ ހިޔާލު