ބޭންކް އޮފް މޯލްޑިވްސް އިން މޯލްޑިވްސް ސާފިން އެސޯސިއޭޝަންގެ ޑިވެލޮޕްމަންޓް ޕާޓްނަރުގެ ގޮތުގައި އެ އެސޯސިއޭޝަނާ އެކު އޮތް އެއްބަސްވުން މިއަދު އާކޮށްފިއެވެ. މި އެއްބަސްވުމުގެ ދަށުން ރާއްޖޭގެ ގައުމީ ޖޫނިއާ އަދި ސީނިއާ ސާފިން ޓީމުތަކުގެ ރަސްމީ ސްޕޮންސަރުގެ ގޮތުގައި ބީއެމްއެލް ދެމިއޮންނާނެއެވެ.
މި ޕާޓްނާޝިޕްގެ ދަށުން ބޭންކުން ވަނީ އަހަރީ ގައުމީ ޖޫނިއާ ސާފިން ޗެމްޕިއަންޝިޕަށް އެހީތެރިކަން ފޯރުކޮށްދިނުމަށް ނިންމާފައެވެ. މި މުބާރާތަކީ ރާއްޖޭގެ ޒުވާން ހުނަރުވެރި ސާފަރުން ހޯދައި، އެކުޅުންތެރިންގެ ހުނަރު ތަރައްގީކުރުމަށް ބޭންކުން ކުރަމުންދާ މަސައްކަތުގެ މުހިންމު ބައެކެވެ. މިއީ 2022 ވަނަ އަހަރު ފެށި މި ޕާޓްނާޝިޕް އާކުރި ދެވަނަ ފަހަރެވެ.
ގައުމީ ފެންވަރުގެ ކުޅިވަރު ޖަމިއްޔާތަކާ ގުޅިގެން ޒުވާނުންގެ ހުނަރު ކުރިއެރުވުމަކީ ބޭންކުގެ އިޖުތިމާއީ ޒިންމާގެ ދަށުން ކުރާ މުހިންމު މަސައްކަތެކެވެ. މީގެ އިތުރުން، މޯލްޑިވްސް އޮލިމްޕިކް ކޮމިޓީއާ ގުޅިގެން ބީއެމްއެލް އިން އަންނަނީ ކުޅިވަރު ސްކޮލަޝިޕް ޕްރޮގްރާމެއް ވެސް ހިންގަމުންނެވެ.
މި ސްކޮލަޝިޕްގެ ދަށުން ގައުމީ ސާފަރު ސައްޔިދު ސަލާހުއްދީން ވަނީ އިންޑޮނޭޝިއާ، ޖަޕާން އަދި ފިލިޕީންސްގައި ކުރިއަށް ގެންދާ ތަމްރީނުތަކުގައި ބައިވެރިވުމުގެ ފުރުސަތު ހޯދާފައެވެ. މިފަދަ ފުރުސަތުތަކުގެ ސަބަބުން ދިވެހި ސާފަރުންނަށް ބައިނަލްއަގުވާމީ މައިދާނުގައި ކާމިޔާބީ ހޯދުމުގެ މަގު ފަހިވެގެންދާނެ ކަމަށް ބޭންކުން ގަބޫލުކުރެއެވެ.
ކިޔުންތެރިންގެ ހިޔާލު