މާލޭގައި ހުންނަ ސްޓޭޓް ފާމަސިއުޓިކަލް އެންޑް މެޑިކަލް ސަޕްލައި (ސްޓޭޓްފާމާ) އިން 19 ފާމަސިސްޓުންނާއި އެސިސްޓެންޓް ފާމަސިސްޓުން ހޯދުމަށް ރަސްމީކޮށް އިއުލާނުކޮށްފިއެވެ.
މި މަގާމުތަކަށް ކުރިމަތިލުމުގެ ފުރުސަތު މި މަހުގެ 30 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
ސްޓޭޓްފާމާއިން މައުލޫމާތު ދޭ ގޮތުގައި އެ ކުންފުނިން ހޯދަމުންދަނީ 19 މުވައްޒަފުންނެވެ. މި މުވައްޒަފުން މަސައްކަތް ކުރާނީ މާލޭގައި ހުންނަ އެ ކުންފުނީގެ ފާމަސީތަކުގައެވެ. މި މަގާމުތަކަށް ޝައުގުވެރިވާ ފަރާތްތަކުން މި މަހުގެ 30 ވަނަ ދުވަހުގެ ކުރިން އެޕްލިކޭޝަން ހުށަހެޅުމަށް ވަނީ އެދިފައެވެ.
ޝަރުތުތަކާއި މުސާރަމި މަގާމުތަކަށް ކުރިމަތިލާ ފަރާތްތަކުގެ ކިބައިގައި ފާމަސީ ދާއިރާއިން ޑިޕްލޮމާއެއް ނުވަތަ އެޑްވާންސްޑް ޑިޕްލޮމާއެއް އޮންނަންވާނެއެވެ. އަދި އެ ދާއިރާގައި މަސައްކަތް ކުރުމުގެ 1 އަހަރާއި 4 އަހަރާ ދެމެދުގެ ތަޖުރިބާ ހުރުން ލާޒިމުވެއެވެ. މުސާރައިގެ ގޮތުގައި ކަނޑައަޅާފައިވަނީ 12,000 ރުފިޔާއާއި 15,000 ރުފިޔާއާ ދެމެދުގެ އަދަދެކެވެ.
ރާއްޖޭގައި ބޭސް ސަޕްލައި ކުރުމުގެ ނިޒާމު ހަރުދަނާ ކުރުމަށްޓަކައި، މިދިޔަ އަހަރުގެ ސެޕްޓެމްބަރު މަހު ސަރުކާރުން ވަނީ ސްޓޭޓްފާމާ އުފައްދާފައެވެ. ބޭސް ލިބުމުގައި ދިމާވާ ދަތިތައް ހައްލުކުރުމަށް އުފެއްދި މި ކުންފުނިން، މި އަހަރުގެ ޖުލައި މަހަށްފަހު ފުރިހަމައަށް މަސައްކަތް ފެށޭނެ ކަމަށް ވަނީ ބުނެފައެވެ. މިހާރު މި ކުންފުނިން އަންނަނީ އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފުރަތަމަ ފާމަސީ ހުޅުވުމުގެ މަސައްކަތް ކުރަމުންނެވެ.
ކިޔުންތެރިންގެ ހިޔާލު