ވ. އަތޮޅަށް ޑައިވިނަށް ގޮސް އުޅެނިކޮށް ގެއްލުނު އިޓަލީވިލާތުގެ ފަތުރުވެރިންގެ ތެރެއިން، ކޭވް އެއްގެ ތެރޭގައި ނިޔާވެފައި ތިއްބާ ފެނުނު މީހުންގެ ތެރެއިން ދެ މީހެއްގެ ހަށިގަނޑު ކަނޑުގެ އަޑިން ނަގައިފިއެވެ.
މި މަހުގެ 14 ވަނަ ދުވަހު ހިނގި މި ހިތާމަވެރި ހާދިސާގައި ގެއްލުނު 4 ފަތުރުވެރިން ހޯދުމަށް އެމްއެންޑީއެފް ކޯސްޓްގާޑާއި، ފުލުހުންގެ ޚިދުމަތް އަދި އިޓަލީ ސަރުކާރުން ހަމަޖެއްސި ބޭރުގެ ތަޖުރިބާކާރު ޑައިވަރުން ގުޅިގެން އިއްޔެ ހިންގި ޚާއްސަ އޮޕަރޭޝަނެއްގައި ވަނީ ގެއްލުނު ހަތަރު މީހުންގެ ހަށިގަނޑު ވެސް ކަނޑުއަޑިން ލޮކޭޓްކޮށްފައެވެ.
އެމްއެންޑީއެފުން ހާމަކުރި ގޮތުގައި، ގެއްލުނު ހަތަރު ޑައިވަރުންގެ ހަށިގަނޑު ވެސް ފެނިފައިވަނީ އެމީހުން ޑައިވް ކުރަން ފޭބި ކޭވްގެ ތެރެއިންނެވެ. މި މީހުންގެ ހަށިތައް ހޯދުމުގެ މަސައްކަތް ހަލުވިކުރުމަށްޓަކައި އިޓަލީ ސަރުކާރުގެ އެހީތެރިކަމާއެކު ރާއްޖެ އައީ ފިންލެންޑަށް ނިސްބަތްވާ ތަޖުރިބާކާރު 3 ޑައިވަރުންނެވެ. އެމްއެންޑީއެފުން ބުނީ މި ޑައިވަރުންނަކީ ދުނިޔޭގެ އެކި ގައުމުތަކުގައި ހިންގާފައިވާ މިފަދަ ނުރައްކާތެރި އަދި އުނދަގޫ މިޝަންތަކުގައި އަމަލީގޮތުން މަސައްކަތްކޮށް، ބޮޑު ތަޖުރިބާއެއް ހޯދާފައިވާ ބައެއް ކަމަށެވެ.
ވ. އަތޮޅަށް ޑައިވިނަށް ގޮސް އުޅެނިކޮށް އިޓަލީގެ 5 މީހަކު ގެއްލިގެން އެމްއެންޑީއެފް ކޯސްޓްގާޑުގެ މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ރިޕޯޓް ލިބުނީ މި މަހުގެ 14 ވީ ބުރާސްފަތި ދުވަހުގެ މެންދުރުފަހު 13:45 ހާއިރެވެ. މައުލޫމާތު ލިބުމާއެކު ސިފައިން ވަނީ ކަނޑާއި ވައިގެ މަގުން އެމީހުން ހޯދުމުގެ ބޮޑު އޮޕަރޭޝަނެއް ފަށާފައެވެ.
މި ހާދިސާގައި ގެއްލިފައިވަނީ ސަފާރީއަކުން ޑައިވިނަށް ދިޔަ އިޓަލީގެ ޑައިވިންގ އިންސްޓްރަކްޓަރަކާއި 4 ޑައިވަރުންނެވެ. އޮޕަރޭޝަންގެ ކުރީކޮޅު އެންމެ ފުރަތަމަ ފެނުނީ އިންސްޓްރަކްޓަރުގެ ހަށިގަނޑެވެ.
ބާކީ ތިބި 4 ޑައިވަރުން ހޯދުމަށް ފުން ކަނޑުގެ ސަރަހައްދުތަކުގައި ސިފައިން ކުރިއަށްގެންދިޔަ ނުރައްކާތެރި މަސައްކަތުގެ ތެރެއިން، މި މަސައްކަތުގައި އުޅުނު ދިވެހި ސިފައިންގެ ހިތްވަރުގަދަ ޑައިވަރެއްގެ ހާލު ދެރަވެ، ފަރުވާދެމުން ދަނިކޮށް ވަނީ ނިޔާވެފައެވެ. ސިފައިންގެ ޑައިވަރު ނިޔާވި ނަމަވެސް، ކޯސްޓްގާޑުން ވަނީ ހުއްޓުމެއްނެތި މަސައްކަތް ކުރިއަށްގެންގޮސް، ބޭރުގެ ތަޖުރިބާކާރުންގެ އެހީއާއެކު ހުރިހާ ހަށިގަނޑެއް ކޭވް ތެރެއިން ހޯދާފައެވެ. އޭގެ ތެރެއިން މިހާރު 2 މީހެއްގެ ހަށިގަނޑު ވަނީ މައްޗަށް ނަގާފައެވެ.
ކިޔުންތެރިންގެ ހިޔާލު