ހިތަދޫ މެދު ދާއިރާގެ މެންބަރު އަހުމަދު އަޒާން، ދައުރު ނޫހުގެ އެޑިޓަރު މޫސާ ލަތީފާއި އެ ނޫހުގެ މައި ކުންފުނި ކަމަށްވާ ނެކްސްޓް މީޑިއާ ގްރޫޕާ ދެކޮޅަށް އަބުރުގެ ދައުވާއެއް ހުށަހަޅައިފިއެވެ.
ކުރިން ނޫސްވެރިއެއްގެ ގޮތުގައި މަސައްކަތް ކުރެއްވި އަދި މިހާރު ވެރިކަން ކުރާ ޕީއެންސީ ތަމްސީލުކުރައްވާ މެންބަރު އަޒާން، މި ދައުވާ ހުށަހަޅުއްވާފައިވަނީ 28 އޭޕްރީލް ގައެވެ.
މި ދައުވާއަކީ އަދަދު ނޫހުގެ އޮފީސް ފުލުހުން ބަލައި ފާސްކުރި މައްސަލައަކާ ގުޅުވައިގެން، ‘އަޒާންގެ ތަޖުރިބާ’ މި ސުރުހީގެ ދަށުން ދައުރު ނޫހުގައި ޝާއިއުކުރި ލިޔުމަކާ ގުޅިގެން ހުށަހެޅި ދައުވާއެކެވެ. އަޒާން ވިދާޅުވާ ގޮތުގައި އެ ލިޔުމުގެ ސުރުހީ އާއި އޭގައި ހުރި ވާހަކަތަކުގެ ސަބަބުން އޭނާގެ އަބުރަށް ވަނީ އުނިކަން ލިބިފައެވެ.
އަޒާން ކޯޓުގައި އެދިވަޑައިގެންފައިވަނީ އޭނާގެ އަބުރަށް އުނިކަން ލިބިފައިވާ ކަމަށް ކަނޑައަޅައިދިނުމަށާއި، އެ ލިޔުން ޑިލީޓް ކުރުމަށް ނުވަތަ އިސްލާހު ކުރުމަށް އަމުރުކޮށްދިނުމަށެވެ. މީގެ އިތުރުން، އަބުރުގެ ބަދަލުގެ ގޮތުގައި 5,000 ރުފިޔާ އާއި، ގާނޫނީ ފީ އާއި ރަޖިސްޓްރޭޝަން ހަރަދުގެ ގޮތުގައި 28,670 ރުފިޔާ ހޯދުމަށް އޭނާ ވަނީ އެދިވަޑައިގެންފައެވެ.
މި މައްސަލަ ބަލައި ނިމެންދެން، އެ ލިޔުން އާންމުންނަށް ނުފެންނަ ގޮތަށް ޑްރާފްޓް މޯޑަށް ބަދަލުކުރުމުގެ އަމުރަކަށް ވެސް އަޒާން ވަނީ އެދިވަޑައިގެންފައެވެ.
ކިޔުންތެރިންގެ ހިޔާލު