ހިތަދޫ އުތުރު ދާއިރާގެ ކުރީގެ މެންބަރު މުހައްމަދު ސިނާން އިންތިޚާބުގައި ވާދަނުކުރަން ނިންމެވީ ޢާއިލާއާއެކު ވަގުތު ހޭދަކުރެއްވުމަށް ކަމަށް ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހު ވިދާޅުވެއްޖެއެވެ.
ޕީއެންސީގެ ޓިކެޓު ކާމިޔާބު ކުރެއްވި ސިނާން އިންތިޚާބުގައި ވާދަނުކުރާނެކަން އިއުލާން ކުރެއްވީ އެޕްރީލް 29 ވަނަ ދުވަހު އެވެ. އޭނާ ވިދާޅުވީ ދާއިރާގެ ރައްޔިތުންނާ ބައްދަލުކުރެއްވުމަށްފަހު، ބައި-އިލެކްޝަނުގައި ވާދަނުކުރަން ނިންމެވީ ކަމަށެވެ. އެގޮތުން، މި ހާލަތުގައި އެންމެ ރަނގަޅު ގޮތަކީ އަމިއްލައަށް ފަހަތަށް ޖެހި، އާ ކެންޑިޑޭޓަކަށް ފުރުސަތު ދިނުން ކަމަށް އޭނާ ހާމަކުރެއްވިއެވެ.
މިކަމާ ގުޅިގެން ޕީއެންސީން ވަނީ ހިތަދޫ މޫލެކެޑެ ދާއިރާގެ ކައުންސިލަރު އަހުމަދު ސައީދަށް ޓިކެޓު ދިނުމަށް ނިންމައިފައެވެ. ސައީދަކީ ހިތަދޫ އުތުރު ދާއިރާގެ ޕްރައިމަރީގައި ވާދަކުރެއްވި ބޭފުޅެކެވެ. ފަލާހު ވިދާޅުވި ގޮތުގައި ސިނާން މި ނިންމެވުން ނިންމެވީ ޕާޓީގެ ލީޑަޝިޕާ މަޝްވަރާ ކުރެއްވުމަށްފަހުއެވެ.
ފަލާހު ވިދާޅުވި ގޮތުގައި ސައީދާއި ސިނާނަކީ ގާތް ދެ ރަހުމަތްތެރިންނެވެ. އަދި ސިނާނާއި އޭނާގެ ސަޕޯޓަރުން މިހާރުވެސް ދަނީ ދޮރުން ދޮރަށް ކެމްޕޭން ހަރަކާތްތަކުގައި ބައިވެރިވަމުންނެވެ. ސިނާން މަޖިލިސް ގޮނޑި ގެއްލުނީ މޯލްޑިވްސް އިސްލާމިކް ބޭންކުން ނެންގެވި 3.8 މިލިއަން ރުފިޔާގެ ލޯނެއް ނުދެއްކުމުން، މި މަހުގެ 12 ވަނަ ދުވަހު ސުޕްރީމް ކޯޓުން ނިންމި ނިންމުމާ ގުޅިގެންނެވެ.
އިލެކްޝަންސް ކޮމިޝަނުން އިއުލާން ކޮށްފައިވާ ގޮތުގައި ހިތަދޫ އުތުރު ދާއިރާގެ ބައި-އިލެކްޝަން އޮންނާނީ ޖޫން 6 ވަނަ ދުވަހު އެވެ. މި އިންތިޚާބުގައި ސައީދުގެ އިތުރުން ވާދަކުރައްވަނީ އެމްޑީޕީގެ ޓިކެޓުގައި ވާދަކުރައްވާ އައްޑޫގެ ކުރީގެ މޭޔަރު އަބްދުﷲ ސޯދިގެވެ.
ކިޔުންތެރިންގެ ހިޔާލު