ސާބިތު ދަރަންޏެއްގެ މައްސަލައިގައި ސުޕްރީމް ކޯޓުގެ ހުކުމާއެކު ރައްޔިތުންގެ މަޖިލީހުގެ ގޮނޑި ގެއްލުނު ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު ސިނާން، އެ ދާއިރާގެ ބައި-އިލެކްޝަންގައި ވާދަކުރުމަށް ޕީއެންސީގެ ޕްރައިމަރީގައި ބައިވެރިވާނެކަން އިއުލާނުކޮށްފިއެވެ.
ސުޕްރީމް ކޯޓުގެ ނިންމުމަށްފަހު، ސިނާން ވަނީ ސޯޝަލް މީޑިއާ މެދުވެރިކޮށް އޭނާ އަލުން އެ ގޮނޑިއަށް ވާދަކުރައްވާނެކަން ކަށަވަރުކޮށްދެއްވާފައެވެ. އޭނާ ވަނީ ޕީއެންސީގެ ޓިކެޓް ހޯދުމަށް ޕްރައިމަރީގައި ވާދަކުރައްވާނެކަން ހާމަކުރައްވައި، އެ ދާއިރާގެ ޕީއެންސީ މެންބަރުންގެ އެހީތެރިކަމަށް އެދިވަޑައިގެންފައެވެ.
ސިނާންގެ ގޮނޑި ގެއްލުނީ ކޯޓުން ދައްކަން އަމުރުކޮށްފައިވާ ދަރަންޏަކަށް ފައިސާ ނުދެއްކުމުގެ ސަބަބުން، ރައްޔިތުންގެ މަޖިލީހުގެ މެންބަރެއްގެ ކިބައިގައި ހުންނަންޖެހޭ ގާނޫނުއަސާސީގައި ބަޔާންކުރާ ޝަރުތެއް އުނިވުމާ ގުޅިގެންނެވެ. މިއީ 20 ވަނަ ރައްޔިތުންގެ މަޖިލީހުގެ މެންބަރެއްގެ ގޮނޑި ގެއްލުނު ފުރަތަމަ ފަހަރެވެ.
ލެކްޝަންސް ކޮމިޝަނުން މިހާރު ވަނީ ހިތަދޫ އުތުރު ދާއިރާގެ ބައި-އިލެކްޝަން އަންނަ ޖޫން މަހުގެ 6 ވަނަ ދުވަހު ބާއްވަން އިއުލާނުކޮށްފައެވެ.
ސިނާންގެ ގޮނޑި ގެއްލުމާއެކު، މަޖިލީހުގައި ޕީއެންސީ ތަމްސީލުކުރާ މެންބަރުންގެ އަދަދު ވަނީ 75 އިން 74 އަށް ދަށްވެފައެވެ.
މި ގޮނޑިއަށް ވާދަކުރެއްވުމުގެ ޝައުގުވެރިކަން އައްޑޫ ސިޓީގެ ކުރީގެ މޭޔަރު ޢަބްދުﷲ ޞާދިގު (ސޯބެ) ވެސް ވަނީ ފާޅުކުރައްވާފައެވެ.
ކިޔުންތެރިންގެ ހިޔާލު