މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ހިޔާނާތުގެ މައްސަލައާ ގުޅިގެން، ޕޮޕިއުލާ މޯލްޑިވްސް ޕްރައިވެޓް ލިމިޓެޑްގެ މައްޗަށް މަނީ ލޯންޑަރިންގެ ދައުވާ އުފުލައިދިނުމަށް ޕްރޮސެކިއުޓާ ޖެނެރަލްގެ އޮފީހުގައި އެންޓި-ކޮރަޕްޝަން ކޮމިޝަން (އޭސީސީ) އިން އެދިއްޖެއެވެ.
އޭސީސީން ހާމަކޮށްފައިވާ ގޮތުގައި، މި މައްސަލަ ދައުވާ ކުރުމަށް ފޮނުވާފައި ވަނީ 10 ފެބްރުއަރީގައެވެ.
ކޮމިޝަނުން ބުނެފައިވާ ގޮތުގައި، ފަތުރުވެރިކަން ތަރައްގީ ކުރުމަށް ރަށްތަކާއި ފަޅުތައް ކުއްޔަށް ދޫކޮށްގެން ދައުލަތަށް ލިބެންޖެހޭ ފައިސާ، 2014 ވަނަ އަހަރުގެ ފެބްރުއަރީ މަހުން ފެށިގެން 2015 ވަނަ އަހަރުގެ އޮކްޓޯބަރު މަހުގެ ނިޔަލަށް، އެސްއޯއެފް ޕްރައިވެޓް ލިމިޓެޑުން ޕޮޕިއުލާ މޯލްޑިވްސްގެ އެކައުންޓުތަކަށް ޖަމާކޮށްފައިވެއެވެ.
އޭސީސީން ބުނި ގޮތުގައި، 13 ޖުލައި 2015 ގައި 150,000 އެމެރިކާ ޑޮލަރު އެސްއޯއެފްގެ ޗެކެއް މެދުވެރިކޮށް ޕޮޕިއުލާ މޯލްޑިވްސްގެ ބޭންކް އެކައުންޓަށް ޖަމާކޮށްފައިވެއެވެ.
ކޮމިޝަނުން ބުނާ ގޮތުގައި، މި މުއާމަލާތަކީ އެމެރިކާ ޑޮލަރު ގަނެވިއްކުމުގެ ބޭރު ފައިސާގެ މުއާމަލާތެއް ކަމަށް ދައްކައިގެން ހިންގާފައިވާ ކަމެކެވެ. ނަމަވެސް، އެ ކުންފުނިން ވަނީ ފައިސާ އައި ގޮތް އޮޅުވާލައި، ފައިސާގެ އަސްލު ވަންހަނާ ކުރަން މަސައްކަތް ކޮށްފައެވެ.
ތަހުގީގަށް ހޯދިފައިވާ ގޮތުގައި، ތ. އޮޅުގިރި ހޯދުމާ ގުޅޭ ފައިސާގެ މުއާމަލާތްތައް ހިންގާފައި ވަނީ ކުށުގެ އަމަލަކުން ހޯދާފައިވާ ފައިސާ ބޭނުންކޮށްގެންނެވެ.
ކުއްޔަށް ދޫކުރުމުގެ އެއްބަސްވުމުގެ ދަށުން، އެ ރަށް 36 މަސް ދުވަހުގެ ތެރޭގައި ރިސޯޓެއްގެ ގޮތުގައި ތަރައްގީ ކުރަން ޖެހެއެވެ. އެއްބަސްވުމުގައިވާ ގޮތުން، ތަރައްގީ ކުރުމުގެ ޒިންމާތައް ފުރިހަމަ ނުކުރެވޭނަމަ، ޓޫރިޒަމް މިނިސްޓްރީއަށް ޖޫރިމަނާ ކުރުމުގެ ނުވަތަ އެއްބަސްވުން ބާތިލް ކުރުމުގެ ބާރު ލިބިގެންވެއެވެ. އޭސީސީން ބުނެފައި ވަނީ ތަރައްގީ ކުރުމަށް ކަނޑައެޅި މުއްދަތުތައް ފުރިހަމަ ކޮށްފައި ނުވާ ކަމަށެވެ.
ކޮމިޝަނުން ހުށަހަޅާފައިވާ ދައުވާތައް ފެތެނީ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ 53 ވަނަ މާއްދާގެ (ހ) އަށެވެ. އަދި މި މުއާމަލާތުގައި ހިމެނޭ 150,000 އެމެރިކާ ޑޮލަރު އަނބުރާ ހޯދުމަށް ވެސް އޭސީސީން އެދިފައިވެއެވެ. މީގެ އިތުރުން، އެއްބަސްވުމާ ހިލާފުވުމުގެ ސަބަބުން ތ. އޮޅުގިރި ދައުލަތަށް ނެގުމަށް ޓޫރިޒަމް މިނިސްޓްރީއަށް ލަފާދޭނެ ކަމަށް ވެސް ކޮމިޝަނުން ބުނެފައިވެއެވެ.
ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި، އެމްއެމްޕީއާރުސީ މެދުވެރިކޮށް ރަށްތަކާއި ފަޅުތައް ކުއްޔަށް ދީގެން ލިބުނު ފައިސާ އެސްއޯއެފްގެ އެކައުންޓުތަކަށް ޖަމާކޮށް، އެކި ފަރާތްތަކަށް ބަހާފައިވެއެވެ. އެސްއޯއެފްގެ އެކައުންޓުތައް 2020 ވަނަ އަހަރު ފްރީޒް ކުރުމަށްފަހު، 2022 ވަނަ އަހަރު ވަނީ ދޫކޮށްލާފައެވެ.
ކިޔުންތެރިންގެ ހިޔާލު