މޯލްޑިވްސް އިސްލާމިކް ބޭންކުން ސޮނެވާ ނަމޫނާއާއި، ރ. ފައިނު ކައުންސިލާ ގުޅިގެން އެރަށުގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ މަޝްރޫޢެއް ހިންގުމަށް އެއްބަސްވުމެއްގައި ސޮއިކޮށްފިއެވެ.
ސޮއިކުރި މި އެއްބަސްވުމުގެ ދަށުން ރ. ފައިނުގައި، ކުނި މެނޭޖްކުރާ ގޮތްތައް ހަރުދަނާ ކުރުމަށް ގިނަ މަސައްކަތްތަކެއް ކުރުމަށް ވަނީ ނިންމާފައެވެ. އެގޮތުން 7 ދުވަހުގެ ވޭސްޓް އޮޑިޓެއް ހިންގައި، ސިސްޓަމެއް ފަރުމާ ކުރުމަށް ބޭނުންވާ ބޭސްލައިނެއް ކަނޑައެޅިގެންދާނެއެވެ. އަދި ކުނި މެނޭޖް ކުރުމަށް ކޮންމެހެން ބޭނުން ކުރަންޖެހޭ މެޝިނަރީތައް އިންސްޓޯލް ކުރުމާއި، އެތަކެތި ބޭނުންކުރާނެ ގޮތުގެ ތަމްރީނުތައް ފޯރުކޮށްދިނުމަށް ނިންމާފައިވާ ކަމަށް އެބޭންކުން ބުނެއެވެ.
މީގެއިތުރުން ކުނިން ގަސްކާނާ އުފައްދާނެ ގޮތުގެ މައްޗަށް ބިނާކޮށް ކުރިޔަށް ގެންދާ ޒީރޯ ވޭސްޓް ވޯކްޝޮޕްތައް ފައިނުގެ ރައްޔިތުންނަށް އަމާޒުކޮށްގެން ކުރިޔަށް ގެންދިޔުމަށްވެސް ވަނީ ހަމަޖަހިފައެވެ. ހަމަ މިގޮތަށް އެންމެނަށް އެނގޭ ބޮޑު ސިއްރުގެ ނަމުގައި މައްސަރު ކަންތައްތަކާއި، ދަރިމައިވުމުގެ ސިއްހަތާ ބެހޭގޮތުން ހޭލުންތެރި ކުރުވުމަށް ބާއްވާ ސެޝަންތައް ވެސް މީގެ ތެރޭގައި ހިމެނިގެން ކުރިޔަށް ގެންދިޔުމަށް ހަމަޖެހިފައިވާ ކަމަށްވެސް އެ ބޭންކުން މައުލޫމާތުދެއެވެ.
MIB signs MoU for the Sustainable Waste Management Project in R. Fainu, reinforcing its commitment to CSR by empowering local communities and promoting sustainable environmental practices. 🌱 pic.twitter.com/3moURvwiHk
— MaldivesIslamicBank (@mibmv) April 28, 2026
މިއީ އެމްއައިބީގެ ކޯޕަރޭޓް ސޯޝަލް ރެސްޕޮންސިބިލިޓީގެ ދަށުން މުޖުތަމަޢުތައް ބާރުވެރިކޮށް، ދެމެހެއްޓެނިވި ތިމާވެށީގެ ތަރައްޤީއަށް އެހީތެރިވެދިނުމަށް އެމްއައިބީން ކުރަމުންދާ މަސައްކަތެއް ކަމަށްވެސް އެ ބޭންކުން މަޢޫލޫމާތުދެއެވެ.
2025 ވަނަ އަހަރުން ފެށިގެން އެމްއައިބީން އަންނަނީ، ސޮނެވާ ނަމޫނާއާއެކު ތިމާވެއްޓާ ގުޅޭ މަޝްރޫޢުތަކުގައި އެކުގައި ކާމިޔާބު މަސައްކަތްތަކެއް ކުރަމުންނެވެ. މިގޮތުން މީގެ ކުރިން ބ. ގޮއިދޫގައިވެސް ވަނީ، މި ޕާޓްނަރޝިޕްގެ ދަށުން ތިމާވެއްޓާ ގުޅޭ މިފަދަ މަޝްރޫޢެއް ހިންގާފައެވެ.
ކިޔުންތެރިންގެ ހިޔާލު