ސިއްޙީ ދާއިރާއާއި އިޖުތިމާޢި ދާއިރާގެ މަސައްކަތްތައް އެއް ފުރާޅެއްގެ ދަށުން ކުރެވެން ފެށުމުން ރައްޔިތުންނަށް އުއްމީދުކުރާ ފެންވަރުގެ ޚިދުމަތްތަކެއް ލިބިގެންދާނެކަމަށް ސިއްޙަތާއި ޢާއިލާއާއި އިޖުތިމާޢީ އެހީއާބެހޭ ވަޒީރު ޤީލާ ޢަލީ ވިދާޅުވެއްޖެއެވެ.

ރާއްޖެމިއަދު ޕްރޮގްރާމްގައި ވަޒީރު ވަނީ ދެ ވުޒާރާ އެއްކޮށްލުމުގެ ބޭނުމާއި އެކަމުން ކުރާނެ ފައިދާތަކުގެ ތަފްސީލް ހާމަކުރައްވާފައެވެ.

“ސިއްޙީ އަދި އިޖުތިމާޢީ ދާއިރާގެ ބައެއް މަސައްކަތްތަކަކީ ވަރަށް ބޮޑަށް ގުޅި ލާމެހިފައިވާ އެކުގައި ކުރެވެން ހުރި މަސައްކަތްތައް. ޚާއްސަކޮށް ފަރުވާދޭ ނިޒާމަކީ ސިއްޙީ ދާއިރާއިން މިހާރު ފޯރުކޮށްދޭ ޚިދުމަތެއްކަމުގައި ވީނަމަވެސް އެއީ އިޖުތިމާޢީ ދާއިރާއިން ތަފާތު ގިންތިތަކުގައި މިއަދު ތިބި ރައްޔިތުންނާ ބޭނުންވާ ޚިދުމަތްތައް ފޯރުކޮށްދިނުމުގައި ގުޅިގެން މަސައްކަތްތައް ކުރެވިގެންދާނެ ދާއިރާއެއް.”  ޤީލާ ޢަލީ

ސިއްޙަތާއި ޢާއިލާއާއި އިޖުތިމާޢީ އެހީއާބެހޭ ވަޒީރު ޤީލާ ޢަލީ ވިދާޅުވީ ސިއްޙީ އަދި އިޖުތިމާޢީ ދާއިރާގައި 10،000އަށްވުރެ ގިނަ މުވައްޒަފުން ތިބިކަމަށާއި، އަދި އެ ދެ ވުޒާރާގެ ދަށުން 70،000އެއްހާ މީހުންނަށް ބޭނުންވާ ޚިދުމަތްތައް ފޯރުކޮށްދެމުންދާކަމަށެވެ.

ދެ ދާއިރާ އެއްކުރުމުގެ މަޤްޞަދަކީ ރައްޔިތުން ޤަބޫލުކުރާ ފެންވަރުގެ ރަނގަޅު ޚިދުމަތްތަކެއް ފޯރުކޮށްދިނުންކަމަށް ވަޒީރު ފާހަގަކުރެއްވިއެވެ. އަދި އިޖުތިމާޢީ ކަންކަމާއި ދުޅަހެޔޮ ސިއްޙަތެއްގައި ރައްޔިތުން ބޭތިއްބުމަށްޓަކައި ބަލިތައް މަދުކުރުމާއި ބަލިތަކަށް ފަރުވާކުރުމުގެ އެންމެހާ ކަންކަން މިހާރަށްވުރެ ހަރުދަނާކޮށް، ހޯދަންޖެހޭ ވަޞީލަތްތައް ފުރިހަމަކޮށް ކަންކަން ބައްޓަންކުުރުމަކީ އެންމެ ބޮޑު އެއް އަމާޒުކަމަށްވެސް ވަޒީރު ޤީލާ ވިދާޅުވިއެވެ.