ލޯކަލް ކައުންސިލް އިންތިޚާބުގެ ދެ ދާއިރާއެއްގެ ވޯޓު އަލުން ގުނުމަށް ހުށައެޅި ދެ މައްސަލައެއް ބަލަިއ ނުގަތުމަށް ހައިކޯޓުން ނިންމައިފިއެވެ.

މި މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބާ ގުޅިގެން ހައި ކޯޓަށް އިންތިޚާބީ ޝަކުވާގެ މައްސަލައެއް ހުށަހެޅީ އެމްޑީޕީގެ ފަރާތުންނާއި ތ. ތިމަރަފުށި ކައުންސިލްގެ މެމްބަރުކަމަށް ވާދަކުރެއްވި ކެންޑިޑޭޓެކެވެ.

މިގޮތުން އިދިކޮޅު އެމްޑީޕީގެ ފަރާތުން ހުށައެޅީ އެ ދާއިރާގެ ވޯޓު ފޮށްޓެއް އަލުން ގުނުމަށް ފަހު، އެމްޑީޕީގެ ދެ ކެންޑިޑޭޓަކަށް ލިބިފައިވާ ވޯޓުތައް ބާތިލް ކޮށްފައިވާތީ އެ ފޮށީގެ ވޯޓުތައް އަލުން ގުނުމަށެވެ. މީގެ އިތުރުން ތިމަރަފުށީ ކައުންސިލަށް ވާދަކުރި ކެންޑިޑޭޓެއްގެ ފަރާތުން ޝަކުވާ ހުށަހެޅާފައިވަނީ މާލޭގައި ބެހެއްޓި ފޮށްޓެއްގެ ވަގުތީ ނަތީޖާ އިއުލާންކުރި ފަހުން ބާތިލް ވޯޓުތައް ވެސް ހިމެނޭ ގޮތަށް ކޮމިޝަނުން ނަތީޖާ ޝީޓަށް ބަދަލު ގެނެސް އެހެން ކެންޑިޑޭޓަކު ހޮވިފައިވާކަމަށް އިއުލާންކުރިކަމަށް ބުނެއެވެ.

މި ދެ މައްސަލައާ ގުޅޭގޮތުން ހައިކޯޓުގެ ރަޖިސްޓްރަރ ވަނީ އިލެކްޝަންސް ކޮމިޝަންގެ ނިންމުން ގާނޫނާ ޚިލާފުވާ ގޮތެއް ބަޔާންކޮށްދީފައި ނުވާތީ، އެ ދެ މައްސަލަ ބަލައިނުގަތުމަށް ނިންމަވާފައެވެ.

އިންތިޚާބުތަކާބެހޭ އާންމު ޤާނޫނު ބަޔާންކުރާގޮތުން އިންތިހާބީ ޝަކުވާގެ މައްސަލަތައް ފުރަތަމަ މަރުހަލާގައި ބަލާނީ ހައި ކޯޓުންނެވެ.